اسلام آباد(نیشنل ٹائمز) اسلام آباد ملک کی انتہائی حساس عمارت پارلیمنٹ ہاوس کے باہر سے ایک مشکوک شخص کو گرفتار کیا گیا ہے، جس کے قبضے سے پستول بھی برآمد ہوا ہے۔ پولیس کے مطابق مشکوک شخص بہت دیر تک اسلحے سمیت پارلیمنٹ ہاوس کے ارد گرد منڈلا رہا تھا، تاہم کسی بھی نقصان کے خدشے کے پیش نظر اسے حکمت عملی کے تحت دیر سے گرفتار کیا گیا، ملزم کے قبضے سے پسٹل برآمد ہوا ہے اور ملزم کو تھانہ سیکرٹریٹ منتقل کر دیا گیا ہے، جہاں تفتیش جاری ہے۔پولیس حکام نے بتایا کہ اسلحہ لہرانے والے شخص کی شناخت ملک سہیل کے نام سے ہوئی ہے، اور وہ چکری کا رہائشی ہے، جب کہ ملزم کی عمر 45 سال ہے، بظاہر اس کا دماغی توازن درست نہیں ہے، تاہم پولیس اس کا ریکارڈ چیک کر رہی ہے۔