اسلام آباد(نیشنل ٹائمز)ابو ظہبی ۔بین الاقوامی بدعنوانی کیس میں مطلوب ملڈوون شہری کو ابوظہبی میں گرفتار کر لیا گیا۔امارات نیوز ایجنسی وام کے مطابق متحدہ عرب امارات کی وزارتِ داخلہ نے بین الاقوامی بدعنوانی کے ایک اہم مقدمے میں مطلوب ملڈووا کے شہری وِٹالی پیرلوگ کو گرفتار کر لیا ہے۔ گرفتار ملزم انٹرپول کی فائلوں کے کنٹرول کمیشن (سی سی ایف ) کے سابق چیئرمین رہ چکے ہیں۔وزارت کے مطابق، پیرلوگ کو 15 جون کو فرانس کی درخواست پر انٹرپول کی جانب سے جاری کردہ ریڈ نوٹس کے تحت گرفتار کیا گیا۔ ان پر جعل سازی، رشوت کی پیشکش،ثالثی اور دھوکہ دہی جیسے سنگین الزامات عائد کیے گئے ہیں۔یہ گرفتاری متحدہ عرب امارات کی بین الاقوامی اور علاقائی اداروں کے ساتھ جاری تعاون کے تحت عمل میں آئی جس میں مختلف قانون نافذ کرنے والے ادارے اور عالمی تنظیمیں شامل ہیں۔ اس کارروائی کو ایسے وسیع تر اقدامات کا حصہ قرار دیا گیا ہے جن کا مقصد معاشرتی تحفظ اور عالمی سطح پر سلامتی کو یقینی بنانا ہے۔فرانسیسی حکام نے اس موقع پر متحدہ عرب امارات کی وزارتِ داخلہ کی پیشہ ورانہ مہارت اور عزم کو سراہتے ہوئے کہا ہے کہ اس نوعیت کی مربوط کارروائیاں سرحد پار جرائم کے خلاف بین الاقوامی تعاون کی اہمیت کو اجاگر کرتی ہیں۔