اسلام آباد(نیشنل ٹائمز)بھارتی میڈیا کے مطابق میرٹھ پولیس کی جانب سے مسلمانوں کو سڑک پر نماز پڑھنے پر سختی سے منع کیا گیا ہے اور خلاف ورزی کی صورت میں سخت قانونی کارروائی کا عندیہ بھی دیا گیا ہے۔پولیس کے مطابق یہ پابندی جمعۃالوداع اور عید الفطر کی نماز سڑک پر پڑھنے پر لگائی گئی ہے، نماز مساجد اور عیدگاہ میں ہی ادا کی جائے گی، خلاف ورزی کی صورت میں پاسپورٹ اور ڈرائیونگ لائسنس کینسل کیا جا سکتا ہے۔اس کے ساتھ ہی پولیس نے مزید کہا کہ سوشل میڈیا کے ذریعے افواہیں یا بدامنی پھیلانے کی کوشش کرنے والوں کے خلاف بھی سخت کارروائی کی جائے گی، سوشل میڈیا پلیٹ فارم پر کڑی نظر رکھے ہوئے ہیں اور فرقہ وارانہ ہم آہنگی میں خلل ڈالنے کی کسی بھی کوشش سے سختی سے نمٹا جائے گا۔میرٹھ میں سکیورٹی کیلئے ڈرون کیمروں کی مدد کے ساتھ ساتھ پولیس کے اہلکار بھی تعینات کر دیے گئے ہیں جبکہ حساس علاقوں میں سادہ لباس اہلکار بھی ڈیوٹی انجام دیں گے۔