اسلام آباد(نیشنل ٹائمز)وزیراعظم شہباز شریف نے اپنے پیغام میں کہا کہ آج کا دن منفرد خوشی کا دن ہے، بطور وزیراعلیٰ پنجاب تعلیم، صحت اور نوجوانوں کے لیے ترجیحی اقدامات کیے، نوجوانوں کو آئی ٹی، اے آئی، ووکیشنل ٹریننگ دی جائے تو ملک کا سرمایہ بنیں گے، بطور وزیر اعلیٰ پنجاب میرٹ پر 4 لاکھ لیپ ٹاپ ہونہار طلبا میں مفت تقسیم کیے، آج کی دنیا جدید ترین ٹیکنالوجی کی متقاضی ہے۔شہباز شریف کا کہنا تھا اگر مختلف ممالک تیل،گیس اور معدنیات سے مالا مال ہیں، تو کروڑوں نوجوان پاکستان کا سرمایہ ہیں، سرمایہ نچھاور کریں گے تو پاکستان دنیا کا سب سے ترقی یافتہ ملک بنے گا، نوجوان ہمارا اثاثہ ہیں، انھیں بہترین ہنر سے نوازیں گے، ہنر مند نوجوانوں کی بدولت ملک کا مستقبل شاندار بنائیں گے۔ان کا کہنا ہے کہ ہمارے قرضے 77 سالوں میں بڑھے ہیں، آئی ایم ایف پروگراموں سے معیشت میں استحکام آتا ہے، پاکستان کی معیشت مستحکم ہوئی ہے، دعا ہے کہ آئی ایم ایف کا پروگرام آخری پروگرام ہو۔انہوں نے کہا کہ ہم نے اس قرضے کی زندگی کو وقار کی زندگی میں بدلنا ہے، کسان، صنعت کار اور نوجوان کو معاشی طور پر مضبوط بنانا ہے، میں آخری دم تک آپ کے حقوق کی جنگ لڑتا رہوں گا، آخری حد تک آپ کو قرضوں سے نجات دلاؤں گا، پاکستان کے نوجوانوں کو باعزت روزگار کے حصول کے قابل بنانا ہے، خادم بن کر پاکستان کی خدمت کرتا رہوں گا۔