اسلام آباد(نیشنل ٹائمز) جیو نیوز کے مطابق سپریم کورٹ نے 9 اور 10 مئی کے رواں اور آئندہ ہفتے مقرر تمام مقدمات ڈی لسٹ کر دیے۔ وکیل ذوالفقار نقوی نے عدالت میں پیش ہوکر بتایا کہ پنجاب حکومت نے مجھے 9 مئی مقدمات میں وکیل مقرر کیا ہے، سپریم کورٹ سے استدعا ہے کہ تیاری کے لیے وقت دیا جائے۔اس پر چیف جسٹس یحییٰ آفریدی نے کہا کہ 9 مئی کے مقدمات تو کل اور پرسوں بھی مقرر ہیں، گزشتہ سماعتوں پر ایڈیشنل پراسیکیوٹر پیش ہو کر وقت مانگتے رہے ہیں، آج آپ وقت مانگ رہے ہیں، ایسے نہیں چلے گا، یہ کوئی ایک کیس نہیں 50 کے قریب اپیلیں ہیں۔ اس موقع پر پنجاب حکومت کے وکیل نے کہا کہ رواں ہفتے کے مقدمات ملتوی کردیں اور آئندہ ہفتے والوں کی تیاری کرکے آؤں گا، اس پر چیف جسٹس نے کہا کچھ اپیلیں کیس منتقلی سے متعلق بھی ہیں، کیس منتقلی کامعاملہ ختم ہوچکا، اس پر حکومت سے ہدایات لے لیں۔ بعد ازاں عدالت نے پنجاب حکومت کی مہلت کی استدعا منظور کرلی جس کے بعد تمام مقدمات کی سماعت عیدکے بعد ہوگی جو چیف جسٹس پاکستان کی سربراہی میں 3 رکنی بینچ کرے گا۔واضح رہے کہ لاہور ہائیکورٹ نے 9 مئی کے ملزمان کی ضمانتیں منظور کی تھیں جس کے بعد پنجاب حکومت نے ضمانتیں منسوخ کرنے کے لیے سپریم کورٹ سے رجوع کررکھا ہے۔