اسلام آباد(نیشنل ٹائمز)وزیرِ اعظم شہباز شریف سے کاروباری شخصیات کے وفد نے ملاقات کی اور کاروباری برادری نے ان کی قیادت میں حکومت کی پالیسیوں پر اعتماد کا اظہار کیا۔اعلامیے کے مطابق کاروباری برادری و سرمایہ کاروں نے سازگار ماحول فراہم کرنے پر وزیراعظم کو خراج تحسین پیش کیا۔اس موقع پر وزیراعظم کا کہنا تھاکہ مخلص اور دیانتدار کاروباری برادری ہمارا قیمتی اثاثہ ہے، آپ سب نے مشکل وقت میں بھی ملکی صنعتی و معاشی ترقی کےلیے اپنا سرمایہ ملک میں لگایا، آپ کی کاوشوں کی بدولت ملک کی معیشت کا پہیہ چلا، لوگوں کو روزگار ملا۔انہوں نے کہا کہ آپ کی مشاورت اور مفید آرا سے ملکی معیشت کو بہترکریں گے اور تمام شعبوں میں اصلاحات کا سفر جاری رکھیں گے، ملکی معیشت صحیح سمت کی طرف گامزن ہے، شرح سود اور مہنگائی کی شرح میں خاطر خواہ کمی آ چکی ہے۔ان کا کہناتھاکہ کاروباری سرگرمیوں اور سرمایہ کاری کےلیے ساز گار ماحول فراہم کر رہے ہیں ، سرمایہ کاری کا سفر مقامی سرمایہ کاروں سے شروع ہوتا ہے، مشاورت کا مقصد ملک کی معیشت کی ترقی میں تیزی لانا ہے، ٹریڈ افسران کو تجارت و برآمدت کے فروغ کے حوالے سے واضح اہداف فراہم کیے جا چکےہیں۔وزیراعظم کا کہنا تھاکہ اپنے سرمایہ کار ملک میں سرمایہ کاری کریں گے تب ہی بیرونی سرمایہ کاری آئے گی، بیرونی سرمایہ کاری لانے کا اس کے سوا کوئی طریقہ نہیں، سرمایہ کاری کا سفر مقامی سرمایہ کاروں سے شروع ہوتا ہے، ہر ہفتے دو بار سرمایہ کاروں سے مل کر ان کی بات سنیں گے۔شرکا نے مختلف شعبوں کے حوالے سے تجاویز بھی پیش کیں اور کہا کہ حکومتی پالیسیوں سے ملکی آئی ٹی کی صنعت دنیا میں تیزی سے اپنا مقام بنا رہی ہے۔وزیرِ اعظم کی تمام متعلقہ وزارتوں کو کاروباری نمائندوں و اسٹیک ہولڈرز سےمشاورت کی ہدایت کی۔