اسلام آباد(نیشنل ٹائمز)واسا راولپنڈی کی جانب سے نافذ کی گئی ایمرجنسی کے مطابق خشک سالی کے باعث راولپنڈی میں پانی کا بحران شدت اختیارکرگیا ہے۔اس حوالے سے ایم ڈی واسا کا کہنا ہے کہ محکمہ موسمیات نےکم بارشوں کی پیشگوئی کی ہے، فروری اور مارچ میں بارشیں نہ ہوئیں توپانی کا مسئلہ سنگین ہو جائے گا۔
پانی ضائع کرنے پر شہریوں کا چالان
دوسری جانب واسا نے پانی ضائع کرنے پر 2 شہریوں کے چالان کیے ہیں۔ایم ڈی واسا نے شہریوں سے اپیل کی ہے کہ پانی کا استعمال کم کریں اور واسا کے ساتھ تعاون کریں۔اس کے علاوہ ایم ڈی واسا نے مزید بتایا کہ خان پورڈیم کی بھل صفائی کے باعث 22 فروری تک پانی کی سپلائی معطل رہےگی جبکہ شہرکوپانی سپلائی کرنے والے راول ڈیم میں بھی پانی کالیول تیزی سےگرنا شروع ہوگیا، راول ڈیم میں پانی ذخیرہ کرنےکی گنجائش 1743.30 فٹ ہے، جو کم ہوکر1669فٹ تک آگئی ہے۔ایم ڈی واسا نے بتایا کہ راول ڈیم میں پانی کی آمد نہ ہونے کے برابر ہے، راول ڈیم سے پانی کا اخراج 95.13 فٹ ہے، راول ڈیم میں صرف 45 دن کا پانی ذخیرہ ہے، بارشیں نہ ہوئیں تو جڑواں شہروں میں پانی کی قلت پیدا ہو جائے گی۔واضح رہے کہ اس سے قبل اسلام آباد میں بھی کم بارشوں کے باعث خشک سالی کے خطرے کا امکان ظاہر کیا جا چکا ہے۔