اسلام آباد(نیشنل ٹائمز)لاہور سےکراچی جانے والی شالیمار ایکسپریس کو شاہدرہ پل پر حادثہ پیش آیا تھا جس کی ویڈیو بھی اب منظر عام پر آگئی ہے۔ویڈیو میں دیکھا جا سکتا ہے کہ ٹرین پل سےگزر رہی تھی کہ اچانک بوگی کا ایک وہیل نیچے گرگیا، وہیل گرنے سے ٹرین کی بوگیاں پٹری سے نیچے اتر گئیں۔شالیمار ایکسپریس کو پیش آنے والے حادثے کے بعد ٹریک پر ٹرینوں کی آمدورفت روک دی گئی تھی اور اب حادثےکا شکار ٹرین کے مسافروں کو دوسری ٹرین کے ذریعے روانہ کر دیا گیا ہے۔ترجمان ریلوے کا اس حوالے سے کہنا ہے کہ 7 بوگیوں کے مسافر براستہ شیخوپورہ اور سانگلہ ہل، وزیرآباد پہنچیں گے، دیگر 8 بوگیوں کے مسافر براستہ لاہور اور ساہیوال، خانیوال پہنچیں گے۔پاکستان ریلوے کے ترجمان کا کہنا ہے کہ خانیوال ریلوے اسٹیشن پر شالیمار ایکسپریس دوبارہ تیار ہوکرکراچی کے لیے روانہ ہوگی۔