راولپنڈی(نیشنل ٹائمز)چیئرمین جوائنٹ چیفس آف اسٹاف کمیٹی جنرل ندیم رضا نے کہا ہے کہ پوری قوم دہشت گردی اور انتہا پسندی کے خلاف متحد ہے،پاک فوج کے شعبہ تعلقات عامہ آئی ایس پی آر کے مطابق پاکستان نیول اکیڈمی میں مڈ شپ مین کورس کی پاسنگ آئوٹ پریڈ ہوئی چیئرمین جوائنٹ چیفس آف اسٹاف کمیٹی جنرل ندیم رضا تقریب میں مہمان خصوصی تھے، اس موقع پر پاک بحریہ کے سربراہ ایڈمرل امجد خان نیازی بھی موجود تھے،آئی ایس پی آر کے مطابق سعودی عرب اور بحرین کی نیول فورسز کے مڈ شپ مین پاس آئوٹ ہوئے، جنرل ندیم رضا نے پاس آئوٹ ہونے والے کیڈٹس کو مبارک باد پیش کی،آئی ایس پی آر کے مطابق جنرل ندیم رضا نے نمایاں کارکردگی کا مظاہرہ کرنے والوں کو اعزازات سے نوازا، قائد اعظم گولڈ میڈل لیفٹیننٹ معراج خالد خان نے حاصل کیا، حمزہ ملک کو سورڈ آف آنر سے نوازا گیا،تقریب سے خطاب کرتے ہوئے جنرل ندیم رضا نے کہا کہ پاکستان خطے میں فروغ امن کے لیے پرعزم ہے، پوری قوم دہشت گردی اور انتہا پسندی کے خلاف متحد ہے،انہوں نے کہا کہ دنیا فروغ امن کے لیے پاکستان کی کوششوں کو تسلیم کرے، دنیا مقبوضہ کشمیر میں انسانی حقوق کی خلاف ورزیوں کانوٹس لے۔