اسلام آباد(نیشنل ٹائمز) پاک فوج کے شعبہ تعلقات عامہ( آئی ایس پی آر)کے مطابق سکیورٹی فورسز نے بلوچستان اور خیبرپختونخوا میں انٹیلی جنس معلومات کی بنیاد پر آپریشنز کیے جس میں 9 دسمبر سے اب تک 43 دہشت گرد ہلاک ہوئے۔آئی ایس پی آر نے بتایا کہ 13 دسمبرکی درمیانی شب سکیورٹی فورسز نے ضلع لکی مروت میں کارروائی کی جس میں خوارج کے ٹھکانے کو مؤثر طریقے سے نشانہ بنایا گیا۔آئی ایس پی آر کے مطابق لکی مروت آپریشن میں 6 خوارج مارے گئے۔ 9 دسمبر سے اب تک پختونخوا میں 18 خوارج ہلاک ہوئے۔آئی ایس پی آر نے بتایا کہ 13 دسمبر کو بلوچستان میں سکیورٹی فورسز نے 2 الگ الگ کاروائیاں کیں، موسیٰ خیل اورپنجگورمیں دو الگ الگ آپریشنزمیں 10 دہشت گردوں کو ہلاک کیا گیا۔آئی ایس پی آر کے مطابق 9 دسمبر سے اب تک بلوچستان میں 25 دہشت گردوں کو ہلاک کیا گیا۔آئی ایس پی آر کا کہنا ہے کہ دہشت گردوں کی ہلاکت سے فتنہ الخوارج اور بلوچستان میں سرگرم دیگر دہشت گرد گروہوں کو بڑا دھچکا لگا، یہ کارروائیاں علاقے میں امن بحال ہوجانے اور خوارج کے خاتمے تک جاری رہیں گی۔آئی ایس پی آر نے کہا کہ سکیورٹی فورسز دہشت گردی کی لعنت کے خاتمے کیلئے پرعزم ہیں۔