اسلام آباد(نیشنل ٹائمز) وزیراعظم شہباز شریف نے ایران پر اسرائیلی حملوں پر تشویش کا اظہار کرتے ہوئے کہا ہے کہ پاکستان امن کے لیے ایران سمیت پڑوسی ممالک کے ساتھ ہے۔
اپنے ردعمل میں وزیراعظم شہباز شریف نےکہا ہےکہ ایسے حملے نا صرف خطے کے امن و استحکام کے لیے خطرہ ہیں بلکہ آزادی کے اصولوں اور عالمی قوانین کی خلاف ورزی ہیں۔وزیراعظم کا کہنا ہےکہ پاکستان امن کے لیے ایران سمیت پڑوسی ممالک کے ساتھ ہے۔ وزیراعظم نے تمام فریقین کو اشتعال انگیزی سے باز رہنے اور تحمل کا مظاہرہ کرنے کی تلقین بھی کی۔
اسرائیلی حملے پر ردعمل دیتے ہوئے ترجمان دفترخارجہ نے کہا ہےکہ اسرائیلی فوجی حملے ایران کی خودمختاری اور علاقائی سالمیت کی خلاف ورزی ہیں، پاکستان ایران کے خلاف اسرائیلی حملوں کی شدید مذمت کرتا ہے۔ترجمان دفترخارجہ نے کہا ہےکہ حملے علاقائی امن اور استحکام کے راستے کے لیے نقصان دہ ہیں، حملے پہلے سے ہی عدم استحکام کا شکار خطے میں خطرناک حد تک کشیدگی میں اضافےکا باعث ہیں، اقوام متحدہ سلامتی کونسل سے مطالبہ ہے کہ بین الاقوامی امن وسلامتی کے قیام کے لیے اپنا کردار ادا کرے۔
