اسلام آباد (نیشنل ٹائمز) تحریکِ انصاف کے چیئرمین بیرسٹر گوہر علی خان نے اعلان کیا ہے کہ پی ٹی آئی آئینی ترمیم پر ووٹ نہیں دے گی۔ اسلام آباد میں سربراہ جے یو آئی ف مولانا فضل الرحمان کے ہمراہ پریس کانفرنس کرتے ہوئے انہوں نے کہا کہ ہم اس سارے پروسیس میں مولانا فضل الرحمان کے کردار پر ان کے شکر گزار ہیں، آئین میں ترمیم ایک سنجیدہ مسئلہ ہے، پاکستان تحریک انصاف واضح کرچکی ہے کہ ہمارے چیئرمین عمران خان ہیں، ہم ہر فیصلہ بانی پی ٹی آئی کے مشورے اور ان کی رضامندی کے ساتھ کرتے ہیں۔
بیرسٹر گوہر علی خان نے بتایا کہ بانی پی ٹی آئی نے جو کل ہدایت جاری کی تھیں کہ ہم مزید مشاورت کریں گے، پاکستان تحریک انصاف ایک اصولی مؤقف لے چکی ہے، ہمارے ایم این ایز اور سینیٹرز کو ہراساں کیا گیا ہے، مولانا فضل الرحمان سے آج طویل نشست رہی ہے، اس بل پر پی ٹی آئی ووٹ نہیں دے سکتی، ہم اس سارے حصہ میں شرکت نہیں کریں گے، ہم ترمیمی بل میں ووٹ نہیں دیں گے، آج پارلیمنٹ میں تقریر کریں گے لیکن اس ترمیم کو ووٹ نہیں دیں گے۔
اس موقع پر جمعیت علماء اسلام ف کے امیر مولانا فضل الرحمان نے کہا کہ جس طرح کا سلوک پی ٹی آئی کے ساتھ رکھا جارہا ہے اس لئے وہ اس عمل کا حصہ نہیں بننا چاہتے اس پر میں بھی سمجھتا ہوں کہ وہ حق پر ہیں، تحریک انصاف نے بائیکاٹ کا فیصلہ کیا ہے تو وہ حق پر ہیں، جائز احتجاج کررہے ہیں، اب ملکی سطح پر اتفاق رائے ہو رہا ہے، اب اُن کو بل نہیں رہا، ہم مزید ترمیم دیں گے اب بھی مفاہمت کا وقت ہے۔