اسلام آباد ( نیشنل ٹائمز) پاکستان تحریک انصاف کے رہنماء اعظم سواتی نے دعویٰ کیا ہے کہ سینئر سیاستدان چوہدری نثار علی خان پی ٹی آئی میں شامل ہونا چاہتے ہیں۔ اسلام آباد میں عدالت پیشی کے موقع پر صحافیوں سے غیر رسمی گفتگو کرتے ہوئے انہوں نے کہ مجھے معلوم ہوا ہے سابق وزیر داخلہ چوہدری نثار علی خان پی ٹی آئی میں شامل ہونا چاہتے ہیں، میں ان کو خوش آمدید کہتا ہوں، چوہدری نثار ایک اصول پسند انسان ہیں، ملک میں قانون کی حکمرانی کے لیے میں مصطفیٰ نواز کھوکھر اور مشاہد حسین سید کو بھی پی ٹی آئی میں آنے کی دعودت دیتا ہوں۔
پی ٹی آئی رہنماء کا کہنا ہے کہ علی امین گنڈاپور کے ساتھ جو انہوں نے کیا اس کی مذمت کرتا ہوں، میں تمام وکلاء کو خراج تحسین پیش کرتا ہوں جو قانون کی حکمرانی کے لیے ہر سطح پر اپنا حصہ ڈال رہے ہیں، مولانا فضل الرحمان کو عقیدت کا سلام پیش کرتا ہوں جنہوں نے قانون کی حکمرانی اور عدلیہ کی آزادی کے لیے اپنا بڑا قدم اٹھایا، آصف زرداری، نواز شریف اور شہباز شریف کے علاوہ باقی تمام سیاسی قائدین کو یکجا ہونا چاہیئے کیوں کہ یہ ہمارا ملک ہے ہم نے اس ملک کو بچانا ہے۔

انہوں نے مزید کہا کہ میں احتجاج کے دن علی امین گنڈاپور کے ساتھ نہیں تھا بلکہ ڈی چوک میں کارکنوں کے ساتھ تھا اور پولیس والوں کو کارکنوں سے بچا رہا تھا یہ عمران خان کی تربیت ہے ہم لڑائی کرنے والے نہیں بلکہ پر امن لوگ ہیں، ورنہ خیبرپختونخواہ ہاؤس پر جس طرح سے حملہ کیا گیا اس سے بڑھ کر حکومت کی ذلالت کوئی نہیں ہوسکتی، اس وقت انتہائی درجے کے لوگ حکومت میں بٹھا دیئے گئے ہیں، عوام، وکلاء، سول سوسائٹی اور عوامی سیاسی قائدین ان سے حساب کتاب لیں گے، موجودہ حالات میں آج پاکستان کو متحد کرنے کی ضرورت ہے اور میں کہتا ہوں عمران خان کے علاوہ پاکستان کو کوئی متحد نہیں کر سکتا۔