اسلام آباد (نیشنل ٹائمز) مسلم لیگ (ن)کے سینئر رہنما اور سینیٹ میںپارلیمانی لیڈر سینیٹرعرفان صدیقی نے کہا ہے کہ آئینی ترامیم کے حوالے ہمیں صرف مولانا فضل الرحمان کے ووٹوں کی نہیں خود مولانا کی بھی ضرورت ہے اور وہ جلد کسی فیصلے پر پہنچ جائیں گے. نجی ٹی وی سے گفتگو کرتے ہوئے سینیٹرعرفان صدیقی نے کہا کہ آئین کے آرٹیکل 63 اے کے بارے میں نظرثانی اپیل پر سپریم کورٹ کے پانچ رکنی بینچ کے فیصلے نے ایک بہت بڑی غلطی کی اصلاح کردی ہے اس سے حکومت یا کسی پارٹی کو نہیں بلکہ آئین کو ریلیف دیا گیا ہے.

انہوں نے کہا کہ دو سال قبل جسٹس عمر عطا بندیال‘جسٹس اعجاز الاحسن اور جسٹس منیب اختر نے پنجاب میں ایک مخصوص جماعت کی حکومت ختم کرنے اور ایک خاص جماعت کی حکومت بنانے کے لیے خود آئین تحریر کرتے ہوئے ایک اضافی جملہ ڈال دیا تھا ایسا کرنے کا واحد مقصد حمزہ شہباز کی جگہ چوہدری پرویز الہی کو وزارت اعلی کی کرسی پر بٹھانا تھا. ایک سوال پر انہوں نے کہا کہ آمریت کی سب سے خوف ناک شکل عدالتی آمریت ہے انتظامیہ کی آمریت حدوں سے نہیں نکل سکتی فوجی آمریت کو بھی کچھ حدود کا علم ہوتا ہے لیکن عدالتی آمریت خود عدل کو ایک ہتھیار کے طور پر استعمال کرتی اور تمام حدیں پھلانگ جاتی ہے.
عرفان صدیقی نے کہا کہ ہمیں صرف مولانا فضل الرحمان کے ووٹوں کی نہیں خود مولانا کی بھی ضرورت ہے سب کچھ دن کے اجالے میں ہو رہا ہے میڈیا میں بحث ہو رہی ہے کہ سیاسی جماعتیں مذاکرات کر رہی ہیں انہوں نے کہاکہ مولانا فضل الرحمان جلد کسی فیصلے پر پہنچ جائیں گے اور ہفتہ 10دن میں پارلیمان کا اجلاس بلایاجائے گا. انہوں نے کہا کہ شنگھائی تعاون تنظیم کے اجلاس کے وقت ملک میں ہنگامہ آرائی کرنا پی ٹی آئی کے کردار سے مطابقت رکھتا ہے2014 میں بھی یہی کچھ کیا تھا اور آج بھی اسی کی تیاریاں کر رہی ہے پی ٹی آئی کی 9 مئی کی سوچ نہیں بدلی عرفان صدیقی نے پاکستان پیپلزپارٹی کے چیئرمین بلاول بھٹو کی اس بات سے اتفاق کیا کہ 25 اکتوبر کے بعد ترمیم کی راہ میں مشکلات پیدا ہو جائیں گی.
انہوں نے کہا کہ 3 مئی کو جوڈیشل کمیشن کے اجلاس میں وزیر قانون نے نیک نیتی کے ساتھ آگاہ کیا کہ حکومت ایک آئینی پیکج لانا چاہتی ہے اگر ہم رات کے اندھیرے میں لانا چاہتے تو چپ رہتے اس سے خطرے کی گھنٹیاں بج اٹھیں اور کچھ ججوں کو خوف پیدا ہوگیا ہے کہ شاید ان کے نیچے سے سیڑھی کھینچی جارہی ہے لہذا تین دن بعد 6 مئی کو انہوں نے آئین اور قانون سے متصادم فیصلہ کرکے حکمران اتحاد کو دوتہائی اکثریت سے محروم کرنے کی کوشش کی تاکہ کوئی آئینی ترمیم نہ ہوسکے.