نیویارک (نیشنل ٹائمز) وزیر اعظم کا کہنا ہے کہ پاکستانی معیشت بہتری کی جانب گامزن ہے، بحرانی صورتحال میں معیشت سنبھالی، آج ترقی کی راہ پر گامزن ہیں۔ تفصیلات کے مطابق وزیراعظم شہباز شریف نے اقوام متحدہ کی جنرل اسمبلی کے 79ویں اجلاس سے خطاب کرتے ہوئے جنرل اسمبلی کے صدر کو انتخاب پر مبارکباد دی۔ اجلاس سے خطاب کرتے ہوئے وزیراعظم شہباز شریف کا کہنا تھا کہ جنرل اسمبلی سے بطور وزیراعظم دوسری بار خطاب باعث اعزاز ہے، موجودہ حالات میں دنیا کو بےشمار چیلنجز کا سامنا ہے۔
موسمیاتی تبدیلیاں عالمی سطح پر اہم چیلنج ہیں، دوسال قبل تباہ کن سیلاب سے پاکستان میں 30 ارب ڈالر کا نقصان ہوا، عالمی شراکت داروں کے ساتھ مل کر پائیدار ترقیاتی اہداف کے حصول کے لیے پُرعزم ہیں۔

وزیراعظم نے کہا کہ 100 سے زیادہ ترقی پذیر ملک قرضوں کے چنگل میں ہیں، عالمی مالیاتی نظام میں اصلاحات ناگزیر ہیں، موثر پالیسیوں کی بدولت پاکستانی معیشت بہتری کی جانب گامزن ہے، معاشی اعشاریے بہتر اور مہنگائی میں کمی ہوئی ہے، بحرانی صورتحال میں معیشت سنبھالی، آج ترقی کی راہ پر گامزن ہیں۔

انہوں نے کہا کہ پاکستان کو بیرونی امداد سے ہونے والی دہشت گردی کا سامنا ہے، دہشت گردی کے خلاف جنگ میں پاکستان نے بہت قربانیاں دی ہیں، پاکستان دہشت گردی کے خلاف جنگ کے لیے پُرعزم ہے، پاکستان کسی بھی بھارتی جارحیت کا فیصلہ کن جواب دے گا، دہشت گردی اس دنیا کے لیے بڑا مسئلہ بنی ہوئی ہے۔ شہباز شریف نے کہا کہ پاکستان کو اب بھی فتنہ الخوارج کی دہشت گردی کا سامنا ہے، دہشت گردی کے خلاف جنگ میں 80 ہزار پاکستانی مارے جا چکے ہیں۔