کراچی (نیشنل ٹائمز) سابق گورنر محمد زبیر نے کہا ہے کہ ملک میں جمہوریت آگے گئی تو ن لیگ کا کوئی مستقبل نہیں،پہلے پھینٹا کھایا، جیلوں میں گئے اور پھر اسی چوائس پر حکومت میں آگئے۔ انہوں نے کہا کہ پیپلزپارٹی اور ن لیگ نے سندھ میں گراس روٹ لیول تک توجہ نہیں دی۔ سندھ میں اینٹی پی پی ووٹ ہوتا ہے جو دوسری جماعتیں لے لیتی ہیں، اندرون سندھ میں پیپلزپارٹی کے مقابلے میں کوئی دوسری پارٹی نہیں ہے۔

انتخابی مہم میں اندرون سندھ ن لیگ کا ایک جلسہ تک نہیں ہوا۔ محمد زبیر نے کہا کہ 30سال سویلین بالادستی کی سیاست کی اب اقتدار کی سیاست اپنا لی۔ن لیگ نے ایسی ہی سیاست کرنی تھی تو پھر 2018میں سمجھوتہ ہی کرلیتے، ملک میں جمہوریت آگے گئی تو ن لیگ کا کوئی مستقبل نہیں۔

پہلے پھینٹا کھایا، جیلوں میں گئے اور پھر اسی چوائس پر حکومت میں آگئے۔مزید برآں چیئرمین پیپلزپارٹی بلاول بھٹو زرداری نے کہا ہے کہ عمران خان کے پیٹرول کی قیمت میں 20روپے کمی کے اعلان سے معیشت کو شدید نقصان پہنچا،آج بھی جو مہنگائی ہے وہ عمران خان کے ایک غلط فیصلے کی وجہ سے ہے، ہم عوام کی قسمت کے فیصلوں میں سیاست کو نہیں معاشی ترقی کو ترجیح دیں گے، پالیسی کیلئے پلاننگ کرنا پڑتی ہے اور پھر عملدرآمد ہوتا ہے، سرمایہ کار سستی بجلی کیلئے سندھ حکومت کا ساتھ دیں، مستحق افراد کو 300یونٹ تک سبسڈی دی جاسکتی ہے۔

چیئرمین بلاول بھٹو نے مستحق افراد میں سولر ہوم سسٹم کی فراہمی کی تقریب سے خطاب کرتے ہوئے کہا کہ سندھ حکومت کا منصوبہ ہے کہ غریبوں اور مستحق افراد کو سولر سسٹم فراہم کریں، مہنگائی اور بجلی بلوں میں اضافے پر فیصلہ کیا کہ سولر کے ذریعے عوام کو ریلیف دیا جائے۔ الیکشن میں ہمارا منشور تھا کہ اگر مرکز میں حکومت ملی تو ملک بھر میں عوام کو ریلیف دینے کے منصوبے لائیں گے۔ اس وقت بڑی تنقید کی گئی۔ ہماری کوشش تھی کہ بے نظیر انکم سپورٹ پروگرام کے تحت پہلے غریب خاندان ترجیح ہوں گے، ہم نے منصوبہ شروع کیا ہے۔ ہم چاہتے ہیں کہ غریب ترین طبقات کو سہولت پہنچائیں، تنخواہ دار طبقات کو بھی سہولت فراہم کریں گے۔