راولپنڈی (نیشنل ٹائمز) پاکستان تحریک انصاف کے بانی عمران خان کا کہنا ہے کہ جلسہ ملتوی کرنے کو میری کمزوری نہ سمجھا جائے، انتشار سے بچنے کیلئے جلسہ ملتوی کیا ہے، ہماری جماعت پرامن سیاسی اور قانونی جدوجہد پر یقین رکھتی ہے،پی ڈی ایم کی حکومت کو نہیں بلکہ ملک کے فیصلہ سازوں کو کہتاہوں اگر ملک کو تباہی سے بچانا ہے تو عوامی مینڈیٹ کا احترام کریں، ملک کو صرف آئین اور قانون کہ پاسداری آگے لے جاسکتی ہے،راولپنڈی کی اڈیالہ جیل میں پارٹی رہنماؤں اعظم سواتی اور بیرسٹرگوہر سے ملاقات میں بانی پی ٹی آئی نے مزید کہا کہ ہماری جماعت کو ختم نبوت کا انتہائی احترام ہے۔
ہمیں رپورٹ ملی ہے کہ مذہبی جماعتیں ختم نبوت کے بچاو کیلئے اسلام آباد ریڈ زون میں اکٹھی ہو رہی ہیں۔

ہم کبھی بھی ملک میں انتشار نہیں چاہتے۔ کسی بھی انتشار سے بچنے کیلئے مشکل فیصلہ کیا اور ترنول میں ہونے والاجلسہ ملتوی کیا گیا ہے۔انہوں نے کہا کہ آزادی کے چاہنے والے میرے اس حکم کو کمزوری نہیں سمجھیں۔ قاضی فائز عیسیٰ اورعامر فاروق جس طرح فیصلوں سے ملک کے قانون اور آئین کی تباہی کررہے ہیں اس پر نظر رکھیں۔

اس امر کو فیصلہ سازوں نے باور کروانا ہے کہ ملک کو صرف آئین اور قانون کہ پاسداری آگے لے جاسکتی ہے 9مئی کے واقعہ میں ہم کسی طرح ملوث ہیں تو اس کی سی سی ٹی وی فوٹیجز سامنے لائی جائیں۔ ساری جدوجہد انصاف اور قانون کی علمبرداری کیلئے ہے۔لاہور میں 27 اگست کو اور اسلام آباد میں 8 ستمبر کو جلسہ ضرور ہونا چاہیے۔خیبرپختونخواہ حکومت کے خلاف جو اپنے لوگ سازش کر رہے ہیں یہ برداشت نہیں کر سکتا۔
بانی پی ٹی آئی عمران خان کا پارٹی رہنماؤں سے گفتگو کرتے ہوئے مزید کہنا تھا کہ انشاءللہ کل سپریم کورٹ جائیں گے اورعامر فاروق،قاضی فائز عیسی کے فیصلوں سے جتنا پاکستاں کو نقصان ہوا ہے اس پر بات کریں گے۔ الیکشن کمیشن و چیف الیکن کمشنر کے خلاف جو ریفرنس فائل کیا ہے اس کی تفصیلات میڈیا کو بتائیں گے۔جس حکومت کے پاس کوئی اختیار نہیں اس سے بات کرنے کا کوئی فائدہ نہیں۔
جعلی حکومت نے ہمارا مینڈیٹ چرایا ہے اس لئے ان سے کسی قسم کی بات نہیں کرونگا۔خیال رہے کہ اس سے قبل پی ٹی آئی رہنماءبیرسٹر گوہر علی خان نے کہا تھا کہ بانی پی ٹی آئی عمران خان کی ہدایت پر جلسہ ملتوی کیاگیاتھا۔ عمران خان نے اعظم سواتی کو بلا کر ہدایات دی تھیں کہ آج ہونے والا جلسہ ملتوی کر دیا جائے۔اس موقع پر پی ٹی آئی رہنما اعظم سواتی کا کہنا تھا کہ قانون کی علمبرداری اور انتشار سے بچنے کیلئے آج ترنول کا جلسہ منسوخ کیا گیا تھا۔
ان کایہ بھی کہنا تھا کہ عمران خان کی جانب سے تمام کارکنان کو ہدایت کی گئی کہ جلسے کی تیاری جاری رکھیں۔پارٹی رہنماءو کارکن عوام میں نکلیں اور آئندہ جلسے کی تحریک چلائیں۔ جلسے کی نئی تاریخ کا اعلان جلد کیا جائے گا۔بعد ازاں سیکرٹری جنرل تحریک انصاف عمر ایوب نے بتایا کہ بانی پی ٹی آئی کی ہدایت پراسلام آبادجلسے کی تاریخ تبدیل کی جا رہی ہے، جلسے کی نئی تاریخ کا اعلان جلد کیا جائے گا۔