لندن (نیشنل ٹائمز) منکی پاکس کے خطرات کے پیش نظر برطانیہ میں بھی ہائی الرٹ جاری کر دیا گیا ۔تفصیلات کے مطابق برطانیہ میں صحت کے حکام نے ملک بھر میں ڈاکٹروں کو ہدایت جاری کی ہے کہ وہ منکی پاکس کے حوالے سے ہائی الرٹ رہیں کیونکہ ایک مہلک ویرینٹ کے یورپ میں داخل ہونے کی تصدیق ہوئی ہےریپڈ ٹیسٹنگ دستیاب کی جا رہی ہیں اور ہسپتالوں سے کہا گیا ہے کہ علامات والے افراد کو الگ تھلگ رکھیں۔

“جنگ ” کے مطابق برطانوی حکومت کا یہ بھی کہنا ہے کہ حکومت کے پاس وباء سے نمٹنے کے لیے کافی ویکسینز اور علاج کے طریقہ کار موجود ہیں۔ ورلڈ ہیلتھ آرگنائزیشن نے منکی پاکس کے افریقہ میں پھیلنے کے بعد عالمی صحت کی ہنگامی صورتحال کا اعلان کیا ہے۔افریقہ سے باہر پہلا کیس سویڈن میں پایا گیا ہے جس نے یورپی سینٹر فار ڈیزیز پریوینشن اینڈ کنٹرول کو خطرے کی سطح کو بڑھانے کا عندیہ دیا ہے۔ماہرین نے کہا کہ وائرس کا نیا ویرینٹ ’’زیادہ شدید‘‘ ہے جس سے زیادہ اموات کا خطرہ ہے۔