اسلام آباد (نیشنل ٹائمز) قومی اسمبلی میں الیکشن ترمیمی ایکٹ 2024 میں دو ترامیم منظوری کیلئے پیش کردی گئیں، ترامیم مخصوص نشستوں اور سیاسی جماعت سے وابستگی سے متعلق ہیں۔ میڈیا کے مطابق اسپیکر قومی اسمبلی سردار ایاز صادق کی زیرصدارت قومی اسمبلی کا اجلاس ہوا، اجلاس میں الیکشن ایکٹ 2017 میں ترمیم کا بل اور آئین کے آرٹیکل 9 اے میں ترمیم کا بل بھی قومی اسمبلی میں پیش کیا گیا، ترمیمی بل حکومتی رکن بلال اظہر کیانی نے ایوان میں پیش کیا۔
رکن اسمبلی زیب جعفر الیکشن ایکٹ کا دوسرا ترمیمی بل 2024 قومی اسمبلی میں پیش کیا۔ ایوان میں الیکشن ترمیمی ایکٹ 2024 میں دو ترامیم منظور کرلی گئی ہیں۔ پہلی ترمیم کہ اپنی کسی سیاسی جماعت سے وابستگی کا اقرار نامہ تبدیل نہیں کیا جاسکتا۔

دوسری ترمیم کے مطابق جس پارٹی نے مخصوص نشستوں کی فہرست نہ جمع کرائی ہواس کو مخصوص نشستیں نہیں دی جاسکتیں۔

یہ دونوں ترامیم منظوری کے بعد فوری نافذ العمل ہوں گی۔ یاد رہے خیال رہے اس سے قبل قومی اسمبلی نے الیکشن ایکٹ ترمیمی بل 2024 کثرت رائے سے منظور کرلیا تھا اپوزیشن کی طرف سے بل کی مخالفت کی گئی تھی۔ وزیر قانون اعظم نذیر تارڑ نے بل ایوان میں پیش کیا، بل الیکشن ٹریبونلز کی تشکیل کے حوالے سے تھی۔ بل کے تحت الیکشن ٹریبونلز میں ریٹائرڈ ججز کو تعینات کیا جاسکے گا۔
الیکشن ٹریبونلز کے قیام کا اختیار آئین کے تحت الیکشن کمیشن کے پاس ہے۔ایوان میں اظہار خیال کرتے ہوئے وزیر قانون نے کہا تھاکہ الیکشن ٹریبونلز ہائیکورٹ کے ریٹائرڈ ججز پر بھی مشتمل ہوسکتے ہیں، وفاقی حکومت نے الیکشن ایکٹ 2017 میں یہ ترمیم تجویز کی گئی تھی۔ سنی اتحاد کونسل نے الیکشن ایکٹ ترمیمی بل کی مخالفت کرتے ہوئے ایوان میں نعرے لگائے تھے۔