اسلام آباد(نیشنل ٹائمز) وفاق المدارس العربیہ پاکستان کے ناظم اعلی مولانا محمد حنیف جالندھری نے سپریم کورٹ کے ختم نبوت اور قادیانیت سے متعلقہ فیصلے کو غیرشرعی، غیر آئینی قرار دیا انہوں نے کہا کہ یہ فیصلہ زمینی حقائق اور تاریخی پس منظر کے بھی منافی ہے۔ مولانا جالندھری نے کہا کہ اس فیصلے کے حوالے سے ملک کی ممتاز دینی اور سیاسی قیادت اور آئینی و قانونی ماہرین سے مشاورت کا عمل جاری ہے خاص طور پر تمام مکاتب فکر کی صف اول کی قیادت باہم رابطے میں ہے ان شاءاللہ جلد حتمی موقف کا اعلان کیا جائے گا۔ مولانا جالندھری نے ملک بھر کی مساجد کے ائمہ و خطباء کے نام ہدایت جاری کی ہے کہ وہ کل جمعہ کے اجتماعات میں اس فیصلے کو موضوع بنائیں، ختم نبوّت اور قادیانیت کے حوالے سےگفتگو کریں اور اس فیصلے کے اثرات و مضمرات سے قوم کو آگاہ کریں۔مولانا جالندھری نے کہا کہ ختم نبوت ہمارے دین و ایمان اور عقیدے کا معاملہ ہے جس پر طویل دینی،سیاسی اور آئینی جدوجہد کی گئ اس لیے اس حوالے سے کسی قسم کی مہم جوئ ہرگز کامیاب نہیں ہونے دیں گے عقیدہ ختم نںوت کے تحفظ اور پاکستان میں قادیانیوں کی آئینی حیثیت کے حوالے سے کسی کو اگر کوئ غلط فہمی ہے تو وہ دور کرلی جائے۔