راولپنڈی(نیشنل ٹائمز) پاک فوج نے دنیا کی دوسری سب سے بڑی چوٹی کے ٹو سر کرنے کی کوشش کے دوران خراب موسم کے باعث بیمار ہونے والے ہالینڈ، سنگاپور اور ایکواڈور سے تعلق رکھنے والے غیر ملکی کوہ پیمائوں کو ریسکیو کرلیا ۔میڈیا رپورٹ کے مطابق کوہ پیمائوں کو مہم جوئی کے دوران صحت کی خرابی کے باعث ریسکیو کیا گیا، کوہ پیمائوں نے پاک آرمی کا شکریہ ادا کیا جنہوں نے بروقت ریسکیو کر کے ان کی جان بچائی۔ کوہ پیمائوں نے پاک فوج کا شکریہ ادا کرتے ہوئے بتایا کہ موسم کی خرابی کے باعث کے ٹو سر کرنے کے دوران طبیعت ناساز ہوگئی تھی، پاک فوج کے اہلکاروں کی بروقت کاروائی سے طبی امداد فراہم کی گئی اور ریسکیو کیا گیا، بروقت کاروائی پر ہم پاک فوج کا شکریہ ادا کرتے ہیں۔یاد رہے کہ 10 جولائی کو دنیا کی 12ویں بلند ترین چوٹی براڈ پیک کو سر کرنے کی کوشش کے دوران طبیعت خراب ہونے پر پاکستانی کوہ پیما سلمہ مسعود اور ڈچ کوہ پیما ریمرہینس رچرڈ کو ریسکیو کرنے کے لیے گلگت بلتستان میں پاک فوج نے خصوصی آپریشن کیا تھا اور دونوں کوہ پیمائو ں کو بحفاظت بذریعہ آرمی ہیلی کاپٹر اسکردو منتقل کر دیا گیا تھا۔پاکستانی کوہ پیما سلمہ مسعود ایک روز قبل براڈ پیک چوٹی سر کرنے کے لیے روانہ ہوئی تھیں، مہم کے دوران طبیعت خراب ہونے پر انھوں نے طبی امداد فراہم کیے جانے کی درخواست کی۔ان کے علاوہ ڈچ کوہ پیما کو دوران مہم سانس لینے میں دشواری سمیت دیگر وجوہات کی بنا پر طبی امداد کی ضرررت پیش آئی، انھوں نے پاک آرمی سے ایکویشن ریکوس کی۔پاک فوج نے انخلا کی درخواست موصول ہونے کے بعد دونوں کوہ پیمائو ں کو فورا بزریعہ ہیلی کاپٹر ریسکیو کرلیا تھا۔دونوں کوہ پیماں نے پاک آرمی کا شکریہ ادا کیا جنہوں نے فوری ایکشن لیتے ہوئے بروقت ریسکیو کیا تھا۔