تل ابیب (نیشنل ٹائمز) اسرائیل نے غزہ میں جنگ کی کوریج پر نیوز چینل الجزیرہ کی بندش میں تیسری مرتبہ 45روز کی توسیع کردی،واضح رہے کہ اسرائیل نے مئی میں الجزیرہ کو بند کرنے کی منظوری دی تھی۔ اسرائیلی وزیر اعظم بینجمن نیتن یاہو نے سوشل میڈیا پلیٹ فارم ایکس پر اپنے بیان میں کہا تھا کہ میری قیادت میں حکومت نے متفقہ طور پر فیصلہ کیا کہ اشتعال انگیز چینل الجزیرہ کو اسرائیل میں بند کر دیا جائے گا۔اسرائیلی حکومت نے الجزیرہ کی اسرائیل میں عربی اور انگریزی میں نشریات بند کرنے اور اس کے دفاتر کو بند حکم دیا تھا۔اسرائیل نے الجزیرہ کے زیر استعمال آلات کو ضبط کرنے اور نیٹ ورک کی ویب سائٹ تک اسرائیل کی رسائی کو محدود کرنے کا بھی حکم دیا تھا۔الجزیرہ نے اسرائیلی فیصلے کی مذمت کی تھی اور اسے مجرمانہ فعل قرار دیا تھا جو معلومات تک رسائی کی خلاف ورزی کرتا ہے۔نیٹ ورک نے کہا کہ اسرائیلی وزیراعظم کا یہ اقدام دھوکے اور بہتان پر مبنی ہے۔ نیٹ ورک نے اصرار کیا کہ وہ تمام کوششوں کے باوجود اپنا کام جاری رکھے گا جس کا مقصد اس کی کوریج کو روکنا ہے جو اس کے عالمی سامعین کے سامنے فلسطین کی زمینی حقیقت کو پیش کرتا ہے۔