لندن( نیشنل ٹائمز) برطانیہ کے ساحل پر 77پائلٹ وہیل مچھلیوں کا جھنڈ مردہ حالت میں پایا گیا ہے، سمندری ماہرین کے مطابق اورکنی کے ساحل پر اتنی بڑی تعداد میں وہیل مچھلیوں کا مردہ حالت میں پایا جانا کئی دہائیوں میں سب سے بڑا واقعہ ہو سکتا ہے،برطانوی غوطہ خور میرین لائف ریسکیو (بی ڈی ایم ایل آر)نے سانڈے جزیرے پر ٹریسنیس بیچ پر 12وہیل مچھلیوں کو پانی سے باہر تڑپتے ہوئے دیکھا،میرین لائف ریسکیو حکام نے ان وہیل مچھلیوں کو واپس گہرے پانی میں بھیجنے کی کوشش کی مگر ناکامی کا سامنا کرنا پڑا،مردہ وہیل مچھلیوں کے جھنڈ میں سات میٹر (22فٹ)تک لمبی نر وہیل کے ساتھ ساتھ مادہ، بچھڑے اور نابالغ بھی شامل تھے،ماہرین کا کہنا ہے کہ یہ جاننا قبل از وقت ہوگا کہ اس کی وجہ کیا ہے، لیکن امکان ہے کہ وہیل مچھلیوں میں سے ایک مشکل میں پڑ گئی ہو گی جس کی مدد کے لیے باقی جھنڈ نے کوشش کی ہو گی۔