نیو یارک(نیشنل ٹائمز)مغربی امریکا کے حصوں کو شدید گرمی کی لہر کا سامنا ہے، 36ملین افراد گرمی کی وارننگ کے زیر اثر ہیں۔امریکی میڈیا رپورٹس کے مطابق ایریزونا ،واشنگٹن، اوریگون میں ریکارڈ درجہ حرارت ہونے کا امکان ہے،کیلی فورنیا کے شہر ریڈنگ میں درجہ حرارت 48اور ڈیتھ ویلی میں 55ڈگری سینٹی گریڈ ریکارڈ کیا گیا جبکہ شمالی کیلیفورنیا کے علاقوں میں درجہ حرارت معمول سے 20ڈگری سے زیادہ ہے۔گرم اور خشک ہوا کے باعث جنگلات میں آگ لگنے کا خطرہ بھی بڑھ گیا اور جنوبی کیلی فورنیا میں آگ کے باعث سانتا باربرا کائونٹی کے کچھ حصوں کو خالی کرنے کی ہدایت کی گئی ہے۔میڈیا رپورٹس کے مطابق دو روز قبل لگنے والی آگ کے باعث 13ہزار ایکڑ اراضی جل کر راکھ ہو چکی ہے۔