سرینگر(نیشنل ٹائمز) مقبوضہ کشمیر میں پیر کو آزادی پسند جنگجو برہان وانی شہید کی آٹھویں برسی کے موقع پر بھارتی فوج کی گاڑی کو گھات لگا کر نشانہ بنایا گیا، جس میں چار بھارتی فوجی مارے گئے اور متعدد زخمی ہوئے۔موصولہ اطلاعات کے مطابق مقبوضہ کشمیر میں کٹھوعہ کے علاقے مچیڑی میں عسکریت پسند وں نے بھارتی فوج کی گاڑی پر حملہ کیا، جس کے بعد علاقے میں تاحال ان کی بھارتی سکیورٹی فورسز کے ساتھ لڑائی جاری ہے۔ بھارتی سیکورٹی فورسز نے پورے علاقے کو گھیرے میں لے لیا ہے اور سرچ آپریشن شروع کردیا گیا ۔واقعہ کی اطلاع ملتے ہی جموں رینج کے ڈی آئی جی سنیل گپتا جموں سے حملے کے مقام کیلئے روانہ ہوگئے۔ اسپیشل آپریشن گروپ (ایس او جی) کی ایک ٹیم کو بھی جموں سے جائے حادثہ کی طرف روانہ کردیا گیا ہے۔ ایک بھارتی افسر نے میڈیا کو بتایا کہ یہ واقعہ کٹھوعہ شہر سے 150 کلو میٹر دور لوہئی ملہار میں واقع بدنوتا گاں میں پیش آیا ہے۔ یہ حملہ اس وقت کیا گیا جب بھارتی فوج کے کچھ سپاہی علاقے میں معمول کی گشت پر تھے۔