اسلام آ باد (نیشنل ٹائمز ) وزیراعظم عمران خان کی زیر صدارت ہونے والے حکومتی اور اتحادی جماعتوں کی پارلیمانی پارٹی کے اجلاس میں حکومت کی اہم اتحادی جماعت پاکستان مسلم لیگ ق نے شرکت نہیں کی۔ ذرائع کے مطابق مسلم لیگ ق کا کوئی رکن اسمبلی اتحادی جماعتوں کی پارلیمانی پارٹی کے اجلاس میں شریک نہیں ہوا۔ اس سے قبل وفاقی وزیر برائے ہاوسنگ طارق بشیر چیمہ نے وزیراعظم کی زیر صدارت کابینہ اجلاس میں بھی شرکت نہیں کی۔ دریں اثنا وفاقی وزیر دفاع پرویز خٹک نے موقف دیتے ہوئے کہا ہے کہ میر ے علم میں نہیں کہ ق لیگ والے اجلاس میں کیوں نہیں آئے۔ ق لیگ کم ہی اجلاسوں میں شرکت کرتی ہے۔