دوحہ (شِنہوا) قطر نے کہا ہے کہ امریکہ اور ایران کے درمیان مذاکرات میں پیش رفت ہوئی ہے۔ قطر کے وزیراعظم اور وزیر خارجہ شیخ محمد بن عبدالرحمن بن جاسم الثانی کی وائٹ ہاؤس میں ہونے والی حالیہ بات چیت کو مثبت قرار دیتے ہوئے قطر نے خبردار کیا کہ ابھی یہ پیش گوئی کرنا قبل از وقت ہے کہ دونوں ممالک کے درمیان معاہدہ کب طے پا سکتا ہے۔
قطر کی وزارت خارجہ کے شعبہ ذرائع ابلاغ و مواصلات کے ڈائریکٹر ابراہیم بن سلطان الہاشمی نے ہفتہ وار بریفنگ کے دوران بتایا کہ قطر کی ثالثی کی کوششوں میں تیزی آئی ہے۔ اس سلسلے میں قطری حکام نے تہران کا دورہ کیا، علاقائی اور بین الاقوامی شراکت داروں سے مشاورت کی اور بعد ازاں واشنگٹن میں بھی بات چیت کی۔
انہوں نے کہا کہ ممکنہ فوجی حملوں سے متعلق میڈیا میں قیاس آرائیوں کے باوجود سفارتی رابطے جاری ہیں اور واشنگٹن اور تہران دونوں کی جانب سے مذاکرات کے ذریعے مسئلے کے حل کے امکانات کے بارے میں مثبت بیانات سامنے آئے ہیں۔
الہاشمی نے کسی معاہدے کے لئے حتمی وقت بتانے سے گریز کرتے ہوئے کہا کہ ’’سفارت کاری کا عمل جاری ہے اور جاری رہے گا، ہم امید کا دامن نہیں چھوڑیں گے۔‘‘ انہوں نے کہا کہ توجہ بدستور کسی معاہدے تک پہنچنے کی کوششوں پر مرکوز ہے۔
قطری ترجمان نے خبردار کیا کہ آبنائے ہرمز کی طویل عرصے تک بندش عالمی توانائی بحران کو مزید سنگین بنا سکتی ہے، خصوصاً ایسے وقت میں جب موسم سرما قریب آ رہا ہے۔ انہوں نے اس اہم بحری گزرگاہ سے بحری آمدورفت کی آزادی جلد بحال کرنے کے لئے کوششیں تیز کرنے پر زور دیا۔