بیجنگ (شِنہوا) چین نے 15ویں 5سالہ منصوبے (2026 تا 2030 )کے دوران اشتہارات کی صنعت کی ترقی کے لئے ایک منصوبہ جاری کیا ہے، جس میں اس شعبے کی سالانہ اوسط شرح نمو تقریباً 10 فیصد رکھنے کا ہدف مقرر کیا گیا ہے۔
یہ منصوبہ ریاستی انتظامیہ برائے مارکیٹ ریگولیشن اور 6 دیگر سرکاری اداروں نے مشترکہ طور پر جاری کیا ہے۔ اس کا مقصد اشتہارات سے وابستہ کاروباروں کے معیار میں مسلسل بہتری، تحقیق و ترقی اور تخلیقی صلاحیتوں میں سرمایہ کاری میں اضافہ اور ڈیجیٹل و ذہین ٹیکنالوجی کے استعمال کی صلاحیتوں کو نمایاں طور پر بہتر بنانا ہے۔
منصوبے کے تحت توقع ہے کہ اس عرصے میں اشتہارات صنعتی جدت، کھپت میں اضافے اور چینی برانڈز کو عالمی سطح پر فروغ دینے میں زیادہ موثر کردار ادا کریں گے۔
منصوبے میں بڑی، درمیانے درجے اور چھوٹی اشتہاری کمپنیوں کی مربوط ترقی، پورے صنعتی سلسلے میں تعاون کو مزید گہرا کرنے اور مختلف علاقوں کے درمیان ہم آہنگ ترقی میں نئی پیش رفت پر بھی زور دیا گیا ہے۔
اس کے علاوہ منصوبے میں اشتہارات کے معیار کو نمایاں طور پر بہتر بنانے اور اشتہارات سے متعلق قوانین و ضوابط کو مزید موثر اور جامع بنانے کا ہدف بھی شامل ہے۔