لوساکا (شِنہوا) لوساکا میں چین کے تعاون سے زرعی مشینری کے استعمال سے متعلق تربیتی پروگرام میں شریک افراد نے اس پروگرام کو سراہتے ہوئے کہا کہ اس سے زیمبیاکے زرعی شعبے کو جدید خطوط پر استوار کرنے میں مدد ملے گی۔
21 ستمبر سے 18 اکتوبر تک جاری رہنے والے اس پروگرام میں زیمبیا کی وزارت ماہی پروری و مویشی بانی اور وزارت زراعت کے 40 افسران اور تکنیکی ماہرین کو تربیت دی گئی۔ اس پروگرام کا انعقاد کیمکو گروپ کے ذیلی ادارے کیمکو کالج نے چینی اکیڈمی آف ایگریکلچرل میکانائزیشن سائنسز (سی اے اے ایم ایس) کے تعاون سے کیا گیا۔
تربیتی پروگرام میں جدید زرعی مشینری، موثر آبپاشی، زمین کی زرخیزی اور ساخت کے تحفظ کے لئے زمین کو کم سے کم چھیڑنے کے طریقوں، نئی توانائی کے استعمال اور فصلوں کی کٹائی کے بعد انہیں سنبھالنے کی جدید ٹیکنالوجی سمیت مختلف موضوعات کا احاطہ کیا گیا۔
مغربی صوبے میں وزارت ماہی پروری و مویشی بانی کے سینئر افسر برائے پیداوار مویشی و توسیعی خدمات بوسٹن مچیلو نے کہا کہ تربیت کے دوران حاصل کردہ معلومات اور عملی مہارتیں ملک بھر میں زرعی مشینری کے استعمال کو فروغ دینے میں مددگار ثابت ہوں گی۔
انہوں نے سی اے اے ایم ایس اور چینی تکنیکی ماہرین کا شکریہ ادا کرتے ہوئے کہا کہ اس پروگرام نے شرکاء کو زمین کے تحفظ کے طریقوں، آبپاشی اور نئی توانائی کے استعمال کے حوالے سے بہترین بین الاقوامی طریقوں سے آگاہ کیا ہے۔
زیمبیا کی وزارت زراعت کے مستقل سیکرٹری برائے انتظامی امور چی زومبا شیپانڈے نے اس بات پر زور دیا کہ زرعی شعبے سے وابستہ افراد کی تکنیکی صلاحیتوں میں اضافہ ضروری ہے تاکہ مشینری سے کسانوں اور مجموعی معیشت کو حقیقی فوائد حاصل ہو سکیں۔
انہوں نے کہا کہ تکنیکی تعلیم، عملی مشقوں، پیشہ ورانہ تبادلوں اور مختلف اداروں کے دوروں کے امتزاج سے شرکاء کو یہ سمجھنے میں مدد ملی کہ زرعی پیداوار کے مختلف نظاموں میں مشینری اور جدید ٹیکنالوجی کو کس طرح استعمال کیا جا سکتا ہے۔
شیپانڈے نے مزید کہا کہ تربیت کے دوران حاصل کردہ مہارتوں سے شرکاء کو زرعی سرگرمیوں کو بہتر بنانے، مشینری کی دیکھ بھال اور مقامی کسانوں کو موزوں ٹیکنالوجی اپنانے میں معاونت فراہم کرنے میں مدد ملے گی۔
کیمکو گروپ کے چیئرمین لی تائی نے کہا کہ یہ تربیتی پروگرام اس بات کا مظہر ہے کہ حکومتوں، تحقیقی اداروں، تربیت فراہم کرنے والے اداروں اور صنعتی شعبے کے درمیان تعاون کے ذریعے چین اور زیمبیا کی شراکت داری کسانوں کی ضروریات پوری کرنے میں اہم کردار ادا کر سکتی ہے۔
انہوں نے مزید کہا کہ کمپنی زیمبیا کی حکومت کے ساتھ مل کر عملی تربیت فراہم کرنے اور زرعی ترقی کے ایک اہم محرک کے طور پر زرعی مشینری کے استعمال کو فروغ دینے کا سلسلہ جاری رکھے گی۔