بیجنگ (شِنہوا) چینی وزارت خارجہ کی ترجمان ماؤ ننگ نے کہا ہے کہ ڈاکٹر سونگ لی کو عالمی ادارہ صحت (ڈبلیو ایچ او) کے ڈائریکٹر جنرل کے عہدے کے لئے امیدوار نامزد کرنا کثیرالجہتی نظام اور عالمی ادارہ صحت کے لئے چین کی مضبوط حمایت کا مظہر ہے۔
ماؤ ننگ نے یہ بات جمعرات کو معمول کی پریس بریفنگ کے دوران ایک متعلقہ سوال کے جواب میں کہی۔
ماؤنے کہا کہ عالمی ادارہ صحت اقوام متحدہ کا ایک خصوصی صحت سے متعلق ادارہ ہے اور عالمی صحت کے نظم و نسق میں قائدانہ اور مربوط کردار ادا کرتا ہے۔
انہوں نے کہا کہ ایسے وقت میں جب کثیرالجہتی نظام کو چیلنجز کا سامنا ہے اور عالمی صحت کے فروغ کے لئے ابھی بہت کچھ کرنا باقی ہے، عالمی ادارہ صحت کے ڈائریکٹر جنرل کا کردار بالخصوص اہمیت اختیار کر گیا ہے تاکہ ادارے کو نئی تبدیلیوں اور حالات کے درمیان رہنمائی فراہم کرتے ہوئے مستحکم اور پائیدار ترقی کی راہ پر گامزن رکھا جا سکے۔
ماؤ ننگ نے کہا کہ ڈاکٹر سونگ کی نامزدگی اس بات کی عکاسی کرتی ہے کہ چین تمام فریقوں کے ساتھ مل کر سب کے لئے عالمی صحت کی برادری کے قیام کو فروغ دینے کے لئے کام کرنے پر آمادہ ہے اور یہ کثیرالجہتی نظام اور عالمی ادارہ صحت کے لئے چین کی مضبوط حمایت کو ظاہر کرتی ہے۔
ماؤ نے کہا کہ ’’ہم سمجھتے ہیں کہ اگر ڈاکٹر سونگ عالمی ادارہ صحت کی ڈائریکٹر جنرل منتخب ہوتی ہیں تو وہ انسانیت کی مجموعی صحت اور بہبود کو بہتر بنانے میں ادارے کے مزید فعال کردار میں مدد کریں گی۔‘‘