بیجنگ (شِنہوا) چین کے خاندانوں میں بچوں کی باقاعدہ نگہداشت کی طلب میں مسلسل اضافے کے ساتھ نوجوان والدین زیادہ سستی، آسان اور قابل اعتماد خدمات کی تلاش میں ہیں۔
چین کے قومی صحت کمیشن (این ایچ سی) نے کہا ہے کہ بچوں کی نگہداشت کو مزید قابل رسائی، سستا اور معیاری بنانے کے لئے اقدامات جاری ہیں۔ ملک کے 15ویں 5 سالہ منصوبے (2026-2030) میں بچوں کی سستی نگہداشت کی تیز تر ترقی پر زور دیا گیا ہے، جس میں حکومت کی جانب سے فراہم کردہ مراکز میں اضافے اور خدمات کے دائرہ کار کو وسیع کرنے کا کہا گیا ہے۔
بہت سے خاندانوں کے لئے سب سے پہلی رکاوٹ اخراجات ہیں۔ 2023 میں ملک بھر میں بچوں کی نگہداشت کی اوسط ماہانہ لاگت فی بچہ 1,978 یوآن (تقریباً 293 امریکی ڈالر) تھی، جس میں کھانے کے اخراجات شامل نہیں تھے۔ بڑے درجے کے شہروں میں ماہانہ فیس 5,500 یوآن سے تجاوز کر گئی، جس کے باعث بہت سے خاندان یہ خدمات حاصل کرنے سے قاصر رہے۔
چین کے شمال مغربی صوبے گانسو کے شہر بائی ین میں فرسٹ پیپلز ہسپتال بچوں کی نگہداشت کا ایک مرکز چلاتا ہے، جہاں پورے دن کی نگہداشت کی ماہانہ فیس 750 یوآن ہے، جس میں روزانہ 3 کھانے اور 2 ہلکی غذائیں شامل ہیں۔
بائی ین کو 2024 میں بچوں کی سستی نگہداشت کی معاونت کے لئے مرکزی حکومت سے 10 کروڑ یوآن کی مالی معاونت ملی۔ پہلی بار خدمات حاصل کرنے والے افراد ایسے واؤچرز کے لئے بھی درخواست دے سکتے ہیں جن کے ذریعے ان کے بچوں کو قریبی مرکز میں 2ہفتے تک مفت آزمائش کی سہولت ملتی ہے۔
دیگر علاقوں میں بھی اخراجات کم کرنے کے لئے اسی طرح کی کوششیں جاری ہیں۔ 2021 سے اب تک 9 صوبوں نے بچوں کی نگہداشت کے لئے سبسڈی متعارف کرائی ہے، جبکہ 1,315 کاؤنٹی سطح کے علاقوں نے تعمیرات اور آپریشن کے لئے سبسڈی سے لے کر خاندانی واؤچرز تک مختلف اقسام کی معاونت فراہم کی ہے۔ اسی عرصے کے دوران ملک بھر میں پورے دن کی بچوں کی نگہداشت کی اوسط فیس میں 29 فیصد کمی آئی ہے۔
خاندانوں کے لئے وسیع تر معاونت بھی بڑھ رہی ہے۔ 2025 سے خاندان 3 سال کی عمر تک ہر بچے کے لئے سالانہ 3,600 یوآن کی مالی معاونت حاصل کرنے کے اہل ہیں۔ والدین 3 سال سے کم عمر بچوں کے لئے اپنی قابل ٹیکس آمدنی میں ہر بچے کے حساب سے ماہانہ 2 ہزار یوآن کی کٹوتی بھی کروا سکتے ہیں۔