اٹلانٹا (شِنہوا) چینی دیو ہیکل پانڈوں کے جوڑے پھنگ پھنگ اور فو شوانگ کو لے جانے والا فیڈ ایکس کا خصوصی کارگو طیارہ امریکہ کے جنوب مشرقی شہر اٹلانٹا پہنچ گیا۔
زو اٹلانٹا کی جانب سے جاری کردہ بیان کے مطابق دونوں پانڈے بعد ازاں زو اٹلانٹا پہنچے جہاں انہیں تقریباً ایک ماہ کی معمول کی قرنطینہ مدت کے لئے زو اٹلانٹا کے نئے پانڈا کمپلیکس کے حیاتیاتی طور پر محفوظ حصے میں رکھا جائے گا۔
زو اٹلانٹا کے صدر اور چیف ایگزیکٹو آفیسر ریمنڈ بی کنگ نے کہا کہ ’’یہ زو اٹلانٹا کے لئے ایک انتہائی خوشی کا دن اور ریاست جارجیا کے شہر اٹلانٹا اور اس سے آگے کے لئے ایک تاریخی لمحہ ہے۔‘‘
کنگ نے مزید کہا کہ ’’ہم پھنگ پھنگ اور فو شوانگ کا خیرمقدم کرتے ہوئے بے حد خوش ہیں اور آنے والے ہفتوں میں اپنے اراکین، مہمانوں، شہر اور کمیونٹی کے ساتھ یہ خوشی بانٹنے کے لئے بہت پرجوش ہیں۔ زو اٹلانٹا کو چائنہ وائلڈ لائف کنزرویشن ایسوسی ایشن کے ساتھ شراکت داری پر فخر ہے تاکہ دیو ہیکل پانڈوں کے تحفظ کے لئے اہم کام جاری رکھا جا سکے کیونکہ اس نسل کی حفاظت ہی اس شراکت داری کا سب سے اہم مقصد ہے۔‘‘
زو اٹلانٹا اب امریکہ کے ان 3 چڑیا گھروں میں شامل ہے جہاں دیوہیکل پانڈے رکھے جاتے ہیں اور یہ جنوب مشرقی امریکہ کا واحد حیوانی ادارہ ہے جو اس نوع کے پانڈوں کا مسکن ہوگا۔
زو اٹلانٹا اور چائنہ وائلڈ لائف کنزرویشن ایسوسی ایشن کے درمیان معاہدے کے مطابق دونوں دیو ہیکل پانڈوں کے 10 سال تک زو اٹلانٹا میں رہنے کی توقع ہے۔
شِنہوا کو معلوم ہوا کہ چینی ماہرین حیوانات اور نگہداشت کرنے والے عملے کے ارکان پانڈوں کی آمد سے پہلے ہی اٹلانٹا پہنچ گئے تھے تاکہ ان کے استقبال کی تیاری کی جا سکے اور قرنطینہ، تربیت اور نئے ماحول سے مطابقت پیدا کرنے کے دوران ان کی زندگی میں معاونت فراہم کی جا سکے۔