بیجنگ (شِنہوا) بیجنگ یونیورسٹی آف پوسٹس اینڈ ٹیلی کمیونیکیشنز (بی یو پی ٹی) میں ہواوے آئی سی ٹی اکیڈمی کی جانب سے حال ہی میں منعقد کئے گئے مصنوعی ذہانت (اے آئی) پر مبنی تربیتی کیمپ میں 70 سے زائد طلبہ نے 3 روزہ جامع تربیت اور عملی مشقوں میں حصہ لیا۔ اس دوران انہیں اے آئی کی بنیادی معلومات، اے آئی آپریٹرز کی تیاری اور اوپن سورس لارج ماڈلز سے متعلق تربیت دی گئی۔
یہ تربیتی کیمپ بی یو پی ٹی اور چینی ٹیکنالوجی کمپنی ہواوے کے درمیان مشترکہ طور پر ہنرمند افرادی قوت تیار کرنے کے وسیع سلسلے کی ایک کڑی تھا۔ دونوں ادارے صنعت اور تعلیم کے درمیان تعاون کو مزید گہرا کر رہے ہیں۔ بی یو پی ٹی کے یے پی داسکول آف انوویشن اینڈ انٹرپرینیورشپ کے نائب ڈین گاؤ پینگ کے مطابق اس طرح کے اقدامات طلبہ کو جدید ترین ٹیکنالوجیز سے روشناس ہونے اور حقیقی دنیا کے منصوبوں کے ذریعے عملی تجربہ حاصل کرنے کے مواقع فراہم کرتے ہیں۔
گاؤ نے کہا کہ ’’ایسے تربیتی کیمپوں کے ذریعے بی یو پی ٹی اور ہواوے کا مقصد ایسے انجینئرنگ پر مبنی اے آئی ماہرین تیار کرنا ہے جن کے پاس مضبوط نظریاتی بنیاد، عملی مہارت اور جدیدیت کا جذبہ ہو تاکہ چین کی تیزی سے ترقی کرتی ہوئی اے آئی صنعت کی ترقی میں نئی توانائی شامل کی جا سکے۔‘‘
اے آئی سے متعلق صلاحیتوں کو پروان چڑھانے کی ایسی کوششیں چین کی جانب سے حال ہی میں 11 نئے پیشوں اور کام کی 23 نئی اقسام کے اعلان کی عکاسی کرتی ہیں، جس سے ظاہر ہوتا ہے کہ اے آئی پر مبنی اقتصادی اور صنعتی ترقی کس طرح تعلیم اور روزگار کو تیزی سے نئی سمتوں میں لے جا رہی ہے۔
وزارت انسانی وسائل و سماجی تحفظ اور دیگر سرکاری محکموں کی جانب سے جاری کئے گئے نئے پیشے چین میں صنعتی تبدیلی کے نتیجے میں پیدا ہونے والے نئے رجحانات اور مارکیٹ کی ضروریات کی عکاسی کرتے ہیں۔ صنعت سے وابستہ ماہرین کے مطابق یہ پیشے اعلیٰ معیار کے روزگار کے لئے کیریئر کے مواقع پیدا کر رہے ہیں۔
روزگار کے نئے مواقع میں ڈیجیٹل معیشت سے متعلق 5 پیشے نمایاں ہیں جن میں ڈیجیٹل ٹوئن انجینئرنگ ٹیکنیشن، مجسم ذہین روبوٹ ایپلی کیشن ٹیکنیشن اور صنعتی مصنوعات کا ڈیجیٹل ماڈلر شامل ہیں۔ یہ پیشے اے آئی کے استعمال، صنعتی ڈیجیٹلائزیشن اور سمولیشن ماڈلنگ جیسے جدید شعبوں کا احاطہ کرتے ہیں۔
ان میں سے 3 کو ’’گرین پیشوں‘‘ میں شمار کیا گیا ہے جن میں مائیکرو گرڈ ایڈمنسٹریٹر، ہائیڈروجن فیول سیل مینوفیکچرنگ ٹیکنیشن اور پانی کی برقی تحلیل کے ذریعے ہائیڈروجن پیدا کرنے والا آپریٹر شامل ہیں۔ خاص طور پر مائیکرو گرڈ ایڈمنسٹریٹر کو بیک وقت گرین اور ڈیجیٹل پیشے کے طور پر درجہ دیا گیا ہے۔
ماحول دوست تبدیلی سے متعلق یہ نئی ملازمتیں اقتصادی اور سماجی ترقی میں جامع ماحول دوست تبدیلی کے لئے چین کی کوششوں کے دوران پیدا ہونے والی افرادی قوت کی ضروریات کی عکاسی کرتی ہیں۔