بیجنگ (شِنہوا) چینی وزیر خارجہ وانگ یی نے کہا ہے کہ چین اور جرمنی کے درمیان باہمی مفاد پر مبنی تعاون کو مضبوط بنانا دونوں ممالک کے مفاد میں ہے اور یہی دونوں کے لئے درست انتخاب ہے۔
جرمن وزیر خارجہ یوہان ویڈفل کے ساتھ ٹیلی فون پر گفتگو کرتے ہوئے وانگ یی، جو کمیونسٹ پارٹی آف چائنہ کی مرکزی کمیٹی کے سیاسی بیورو کے رکن بھی ہیں، نے چین اور جرمنی پر زور دیا کہ وہ کثیرجہتی نظام اور آزاد تجارت کے مشترکہ تحفظ کے لئے مثبت پیغام دیں، چین-جرمنی تعلقات کی ترقی پر اعتماد بڑھائیں اور چین-یورپی یونین تعلقات کی بہتری میں تعمیری کردار ادا کریں۔
وانگ یی نے کہا کہ چین اور جرمنی دنیا کی بڑی معیشتیں اور جامع تزویراتی شراکت دار ہیں۔ یکطرفہ مفاد اور عالمی سطح پر اقتصادی روابط میں کمی کے رجحان کے پیش نظر دونوں ممالک کے لئے ضروری ہے کہ وہ تزویراتی رابطے مضبوط کریں، باہمی اعتماد بڑھائیں اور عملی تعاون کو مزید مضبوط بنائیں۔
انہوں نے کہا کہ دونوں ممالک کو اب تک حاصل ہونے والی پیش رفت کو قدر کی نگاہ سے دیکھنا چاہیے، چین-جرمنی تعاون کو مزید مضبوط بنانا چاہیے اور مسلسل نئے نتائج حاصل کرنے چاہئیں۔
وانگ یی نے نشاندہی کی کہ ایک چین کا اصول چین-جرمنی تعلقات کی سیاسی بنیاد ہے۔ انہوں نے امید ظاہر کی کہ جرمنی باہمی اعتماد اور دوستی کی روایت کو اہمیت دیتے ہوئے اسے آگے بڑھائے گا، ایک چین کے اصول پر قائم رہے گا اور چین-جرمنی تعلقات کے ساتھ ساتھ آبنائے تائیوان میں امن و استحکام کے تحفظ کے لئے عملی اقدامات کرے گا تاکہ دونوں ممالک کے درمیان اعلیٰ سطح کے تبادلوں کے لئے سازگار حالات پیدا کئے جا سکیں۔
وانگ یی نے کہا کہ چین اور یورپی یونین جامع تزویراتی شراکت دار ہیں اور دونوں فریقوں کو تجارتی جنگ نہیں لڑنی چاہیے۔
انہوں نے کہا کہ چین کا مسلسل موقف رہا ہے کہ چین اور یورپی یونین کو ایک ہی سمت میں آگے بڑھنا چاہیے اور ایک دوسرے کے تحفظات کو مذاکرات اور مشاورت کے ذریعے دور کرنا چاہیے۔
وانگ یی نے امید ظاہر کی کہ جرمنی ایک معقول اور عملی رویہ برقرار رکھے گا، یورپی یونین کے اندر مثبت کردار ادا کرے گا اور یورپی یونین کو آزاد تجارت کے اصول پر قائم رہنے، تحفظ پسندانہ پالیسیوں کو مسترد کرنے اور وسعت، تعاون، مذاکرات اور مشاورت کی درست سمت پر قائم رہنے میں مدد دے گا۔
جرمن وزیر خارجہ یوہان ویڈفل نے کہا کہ حالیہ برسوں میں جرمنی اور چین کے تعلقات میں ترقی کا مثبت رجحان برقرار رہا ہے۔
ویڈفل نے کہا کہ جرمنی چین کے ساتھ اعلیٰ سطح کے تبادلوں کو مزید مضبوط بنانے، جرمنی-چین بین الحکومتی مشاورت کے نئے دور کے انعقاد، تجارت اور معیشت سمیت مختلف شعبوں میں عملی تعاون مضبوط بنانے اور دوطرفہ تعلقات کو مسلسل آگے بڑھانے کا خواہاں ہے۔
انہوں نے کہا کہ جرمنی ایک چین کی پالیسی پر مضبوطی سے قائم ہے اور اس موقف میں کوئی تبدیلی نہیں آئے گی۔