واشنگٹن (شِنہوا) امریکی صدر ڈونلڈ ٹرمپ نے دعویٰ کیا ہے کہ امریکہ نے ڈنمارک اور گرین لینڈ کے ساتھ ایک معاہدہ کیا ہے، جس کے تحت امریکہ کو گرین لینڈ کی سکیورٹی اور دیگر ضروریات پر”مستقل کنٹرول” حاصل ہوگا۔
ٹرمپ نے سوشل میڈیا پلیٹ فارم ٹروتھ سوشل پر ایک پوسٹ میں لکھا کہ میری ہدایت پر ہم نے ڈنمارک اور گرین لینڈ کے نمائندوں کے ساتھ مل کر یہ یقینی بنایا ہے کہ امریکہ کو گرین لینڈ میں ضروری اقدامات کرنے کا اختیار ہمیشہ حاصل رہے گا۔
انہوں نے کہا کہ ہم گرین لینڈ کے موزوں علاقوں میں بھاری تعداد میں فوجی موجودگی قائم کرنے کا عمل فوری طور پر شروع کریں گے۔
امریکی صدر نے اس معاہدے کو “لامحدود مدت” کا معاہدہ قرار دیا جس کی میعاد ختم ہونے کی کوئی تاریخ نہیں ہوگی۔ انہوں نے کہا کہ اس معاہدے پر امریکہ کو کوئی اخراجات برداشت نہیں کرنا پڑیں گے۔
معاہدے کی مکمل تفصیلات فوری طور پر جاری نہیں کی گئیں۔
ڈنمارک کی وزیراعظم میٹ فریڈرکسن کے دفتر نے کہا ہے کہ توقع ہے کہ معاہدے پر اقوام متحدہ کی آئندہ جنرل اسمبلی کے اجلاس کے دوران دستخط کئے جائیں گے تاہم اس کے لئے قومی پارلیمان کی ضروری کارروائی بھی مکمل کرنا ہوگی۔
گرین لینڈ، مملکت ڈنمارک کے اندر ایک خود مختار علاقہ ہے۔
گرین لینڈ کو امریکہ کا حصہ بنانے سے متعلق ٹرمپ کے سابقہ بیانات کو ڈنمارک، گرین لینڈ اور کئی یورپی ممالک کی جانب سے شدید مخالفت کا سامنا کرنا پڑا تھا۔