بیجنگ (شِنہوا) چین نے یورپ کو ہائبرڈ گاڑیوں کی برآمد پر نام نہاد رضاکارانہ پابندیوں کی سختی سے مخالفت کرتے ہوئے کہا ہے کہ یہ پابندیاں عالمی تجارتی تنظیم (ڈبلیو ٹی او) کے قوانین کی سنگین خلاف ورزی اور منڈی کی معیشت کے اصولوں اور منصفانہ مسابقت کے منافی ہیں۔
چین کی وزارت تجارت کے ترجمان نے یہ بات حالیہ میڈیا رپورٹس کے حوالے سے کہی جن میں کہا گیا تھا کہ یورپی یونین (ای یو) چین سے یورپ کو ہائبرڈ گاڑیوں کی برآمد رضاکارانہ طور پر محدود کرنے کا مطالبہ کر رہی ہے بصورت دیگر چین کو زیادہ ٹیرف کا سامنا کرنا پڑ سکتا ہے۔
ترجمان نے کہا کہ یہ نام نہاد رضاکارانہ برآمدی پابندیاں ڈبلیو ٹی او کے قوانین کی سنگین خلاف ورزی اور منڈی کی معیشت کے قوانین اور منصفانہ مسابقت کے اصول کے منافی ہیں۔ چین اس کی سختی سے مخالفت کرتا ہے۔
ترجمان نے مزید کہا کہ چین کا موقف واضح اور مستقل ہے۔ چین اور یورپی یونین کے درمیان کسی بھی حل میں مفادات کا توازن یقینی بنایا جانا چاہیے، ڈبلیو ٹی او کے قوانین اور دونوں فریقوں کے متعلقہ ملکی قوانین کی پاسداری ہونی چاہیے اور دونوں جانب کی صنعتوں کے مفادات کو مکمل طور پر مدنظر رکھنا چاہیے۔