شین یانگ (شِنہوا) فضائی حملے کے سائرن بجنے لگے، ٹریفک رک گئی اور راہ گیر اپنی جگہ ٹھہر گئے۔ جمعہ کی صبح 9 بج کر 18 منٹ پر شین یانگ شہر تین منٹ کی خاموشی میں ڈوب گیا تاکہ چین پر جاپانی حملے میں مارے جانے والوں کو خراج عقیدت پیش کیا جا سکے اور بڑی قربانیوں سے حاصل ہونے والے امن کی قدر کی جا سکے۔
جمعہ کو 18 ستمبر کے واقعے کی 95ویں برسی منائی گئی، جو جاپانی جارحیت کے خلاف چین کی 14 سالہ مزاحمتی جنگ کا آغاز تھا۔ 18 ستمبر 1931 کو جاپانی فوجیوں نے شین یانگ کے قریب اپنے زیر کنٹرول ریلوے لائن کے ایک حصے کو دھماکے سے اڑا دیا اور اس کا الزام چینی فوجیوں پر عائد کرتے ہوئے اسے تخریب کاری قرار دیا۔ بعد ازاں اسی رات شین یانگ کے قریب بیرکوں پر حملے کے لئے اسے جواز کے طور پر استعمال کیا گیا اور چین پر پہلے سے منصوبہ بند حملے کا آغاز کر دیا گیا۔
1995 سے چین کے شمال مشرقی صوبے لیاؤننگ کے دارالحکومت شین یانگ میں ہر سال اس روز فضائی حملے کے سائرن بجا کر اس واقعے کی یاد منائی جاتی ہے۔
شین یانگ میں قائم بریلیئنس آٹو کے ملازم لی شویانگ نے کہا کہ ’’سائرن بجنے کے دوران وہ چند منٹ جب سب کچھ رک گیا، مجھے یاد دلاتے ہیں کہ ہماری روزمرہ زندگی بڑی قربانیوں سے حاصل ہونے والے امن کی مرہون منت ہے۔‘‘
دھماکے کی جگہ کے قریب قائم 9.18 تاریخی عجائب گھر میں جمعہ کی صبح منعقدہ ایک تقریب کے دوران زندگی کے مختلف شعبوں سے تعلق رکھنے والے 14 نمائندوں نے سنجیدگی سے انتباہ کی گھنٹی بجائی۔ گھنٹی کی 14 آوازیں فضا میں گونج اٹھیں، جو چینی عوام کی جاپانی حملہ آوروں کے خلاف 14 سالہ دشوار جدوجہد کی علامت تھیں۔
قومی عوامی کانگریس کی قائمہ کمیٹی کے نائب چیئرمین اور کمیونسٹ پارٹی آف چائنہ کی مرکزی کمیٹی کے سیاسی بیورو کے رکن لی ہونگ ژونگ نے تقریب میں شرکت اور خطاب کیا۔
لی نے کہا کہ جاپانی جارحیت کے خلاف چینی عوام کی مزاحمتی جنگ جدید دور میں غیر ملکی جارحیت کے خلاف چین کی پہلی مکمل فتح تھی۔ انہوں نے تاریخ سے سبق حاصل کرتے ہوئے مستقبل کی راہ روشن کرنے پر زور دیا اور پارٹی کی مجموعی قیادت برقرار رکھنے، چینی طرز کی جدیدیت کو آگے بڑھانے اور انسانیت کے مشترکہ مستقبل کی حامل برادری کی تعمیر میں کردار ادا کرنے کی اہمیت اجاگر کی۔
شین یانگ کے چھٹی جماعت کے طالب علم ما زی ہاؤ نے کہا کہ ’’میں نے درسی کتابوں میں 18 ستمبر کے واقعے کے بارے میں پڑھا تھا۔ آج گھنٹی کی آواز سن کر میں مزید جاننا چاہتا ہوں کہ اس وقت میری عمر کے بچوں نے کن حالات کا سامنا کیا تھا۔‘‘
تقریب میں شریک 93 سالہ بزرگ ریٹائرڈ فوجی یانگ ہوا فینگ نے کہا کہ ’’آج کے بچوں کو بے فکری کے ساتھ سکول جاتے دیکھ کر مجھے محسوس ہوتا ہے کہ اس وقت دی گئی قربانیاں رائیگاں نہیں گئیں۔ مجھے امید ہے کہ وہ ان شہداء کو یاد رکھیں گے جنہوں نے اس ملک کے لئے اپنی جانیں قربان کیں اور سمجھیں گے کہ امن کتنا قیمتی ہے۔‘‘
شین یانگ میں منعقدہ تقریبات نے ملک بھر میں 18 ستمبر کے واقعے کی 95ویں برسی کے سلسلے میں ہونے والی تقریبات کی قیادت کی۔ جاپانی جارحیت کے خلاف چینی عوام کی مزاحمتی جنگ (1931-1945) فسطائیت کے خلاف عالمی جنگ میں سب سے پہلے شروع ہونے والی اور سب سے طویل عرصے تک جاری رہنے والی جنگ تھی۔ 14 سال کے دوران تقریباً 3 کروڑ 50 لاکھ چینی شہری ہلاک یا زخمی ہوئے۔
9.18 تاریخی عجائب گھر کے محقق گاؤ جیان نے کہا کہ ’’ہر سال منعقد ہونے والی یہ تقریبات نوجوان نسل کو جنگ اور اپنی زندگیوں کے درمیان تعلق پر دوبارہ غور کرنے کا موقع فراہم کرتی ہیں۔ صرف عام لوگوں پر جنگ سے آنے والی تکالیف کو یاد رکھ کر ہی ہم حقیقی معنوں میں امن کی قدر اور اس کے تحفظ کے لئے درکار کوششوں کو سمجھ سکتے ہیں۔‘‘