اسلام آباد (نیشنل ٹائمز)سوشل میڈیا کو ریگولیٹ کرنے کے لیے قانون مزید سخت کرنے کا فیصلہ کیا گیا ہے۔ وزارت داخلہ نے تمام سٹیک ہولڈرز سے مشاورت کا فیصلہ کرلیا۔ ذرائع کے مطابق سوشل میڈیا پر بچوں کے استحصال اور فحاشی کے بڑھتے واقعات کے پیش نظر استعمال کے لیے عمر کی حد مقرر کرنے کی تجویز زیرغور ہے۔ فیملی وی لاننگ کے نام پر فحاشی کنٹرول کرنے کی تجاویز بھی شامل ہیں جبکہ کئی ممالک کی طرح کچھ سوشل میڈیا پلیٹ فارمز پر پابندی لگانے پر بھی غور کیا جارہا ہے ۔ذرائع کے مطابق وزارت داخلہ میں اجلاس کے دوران مشاورت سے حتمی فیصلے ہوں گے ۔ اجلاس میں پی ٹی اے ، این سی سی آئی اے ، وفاقی و صوبائی پولیس حکام شریک ہوں گے جبکہ بچوں کے استحصال اور فحاشی کے کیسز کا جائزہ پیش کیا جائے گا۔اجلاس میں آسٹریلیا سمیت مختلف ممالک کی سوشل میڈیا پالیسیوں کا بھی جائزہ لیا جائے گا۔