بیجنگ (شِنہوا) چین میں غیر بینکاری اداروں، جن میں کاروباری ادارے اور افراد شامل ہیں، کی جانب سے اگست میں سرحد پار وصولیوں اور ادائیگیوں کا مجموعی حجم 15 کھرب امریکی ڈالر رہا، جو 2026 کے آغاز سے جاری نسبتاً تیز رفتار نمو کا تسلسل ہے۔
رقوم کی سرحد پار وصولی اور ادائیگیوں کے اعداد و شمار کسی ملک کی سرحد پار تجارت، سرمایہ کاری اور مالیاتی سرگرمیوں کی سطح کو ظاہر کرتے ہیں۔ ریاستی انتظامیہ برائے زرمبادلہ (سیف) کی جانب سے جاری کردہ اعداد و شمار کے مطابق اگست میں سرحد پار سرمائے کی خالص آمد 62.4 ارب امریکی ڈالر رہی جو گزشتہ ماہ کے مقابلے میں 4 فیصد زیادہ ہے۔
سیف کے نائب سربراہ اور ترجمان لی بن نے بتایا کہ سرحد پار سرمائے کی خالص آمد کی بنیادی وجہ اشیاء کے تبادلے سے متعلق رقوم کی بڑی مقدار میں آمد تھی۔ دوسری جانب موسم گرما کی تعطیلات کے دوران چینی شہریوں کے بیرون ملک تعلیم اور سیاحت کے لئے زیادہ سفر کرنے سے خدمات کی تجارت کا خسارہ بڑھ گیا، جو اگست میں گزشتہ ماہ کے مقابلے میں 6 فیصد زیادہ رہا۔
لی بن نے کہا کہ اسی ماہ سرحد پار دو طرفہ براہ راست سرمایہ کاری مجموعی طور پر مستحکم رہی۔
ترجمان نے مزید بتایا کہ گزشتہ ماہ چین کی زرمبادلہ مارکیٹ میں 39 کھرب امریکی ڈالر مالیت کی تجارت ہوئی جو نسبتاً بڑی سطح پر برقرار رہی۔
لی بن کے مطابق گزشتہ ماہ ملک میں بینکوں کے ذریعے زرمبادلہ کی تصفیوں اور فروخت کا 48.5 ارب امریکی ڈالر کا سرپلس ریکارڈ کیا گیا، جس کی بنیادی وجہ زرمبادلہ کے فنڈز کی خالص آمد تھی۔