شنگھائی (شِنہوا) چین نے بدھ کے روز مشرقی شہر شنگھائی کے ساحل کے قریب سمندر سے 9 مصنوعی سیارے ان کے مقررہ مدار میں روانہ کر دیئے۔
تائی یوآن سیٹلائٹ لانچ سنٹر نے اس لانچ مشن کو انجام دیا۔ سیٹلائٹس، جن میں چیان فان کانسٹیلیشن سیٹلائٹس کا نیا گروپ اور ایک ای یو ایچ ٹی ٹیکنالوجی ٹیسٹ سیٹلائٹ شامل تھا، بیجنگ کے وقت کے مطابق صبح 6 بجے گریوٹی-1 وائی 3 کیریئر راکٹ کے ذریعے خلا میں روانہ ہوئے۔ مشن کو مکمل طور پر کامیاب قرار دیا گیا ہے۔
راکٹ تیار کرنے والی چینی تجارتی خلائی کمپنی اورین سپیس کے مطابق اس مشن میں وزن لے جانے اور مدار کی بلندی کے لحاظ سے چین کے ایک سمندری لانچ کا نیا ریکارڈ قائم کیا گیا ہے جس میں خالص وزن 3 ٹن سے زیادہ اور مدار میں داخلے کی بلندی تقریباً 800 کلومیٹر رہی۔ اس سے سمندری لانچنگ ماڈل کی درمیانے اور بڑے سائز کے مصنوعی سیاروں کی مہمات کے لئے مطابقت بخوبی ثابت ہو جاتی ہے۔
گریویٹی-1 راکٹ اب تک 4 کامیاب سمندری لانچ کر چکا ہے۔ یہ مہم زمین کے نچلے مدار کے بڑے مصنوعی سیاروں کے انٹرنیٹ کانسٹیلیشن کی نیٹ ورکنگ کے لئے اس کی پہلی روانگی تھی۔
اورین سپیس کے مطابق راکٹ میں موجود ان مصنوعی سیاروں کو شنگھائی میں ہی تیار کیا گیا تھا اور یہ وہاں قریب ہی سمندر سے خلا میں روانہ کئے گئے۔ اس طرح زمین اور سمندر کی ہم آہنگی سے تجارتی بنیادوں پر خلائی ساز و سامان تیار کرنے اور اسے خلا میں بھیجنے کا مجموعی عمل بہتر بنانے میں مدد ملتی ہے۔