بیجنگ (شِنہوا) چین کی وزارت زراعت کے مطابق زرعی اور دیہی ترقی کو فروغ دینے کی وسیع تر کوششوں کے حصے کے طور پر دیہی احیا کے لئے سرمایہ کاری کا نظام بہتر بنانے کا ایک منصوبہ متعارف کرایا گیا ہے۔
وزارت زراعت و دیہی امور، قومی ترقی و اصلاحات کمیشن اور پیپلز بینک آف چائنہ سمیت متعدد سرکاری اداروں نے مشترکہ طور پر جاری کردہ اس منصوبے میں مضبوط مالیاتی و معاشی تعاون اور نجی و سماجی سرمایہ کی شمولیت میں اضافے پر زور دیا ہے جس کا مقصد دیہی احیا میں مسلسل سرمایہ کاری بڑھانا اور زراعت، دیہی علاقوں و کسانوں کے لئے سرمایہ کاری کا ڈھانچہ مزید بہتر بنانا ہے۔
منصوبے کے مطابق 2030 تک ملکی ہدف دیہی احیا کے لئے بنیادی طور پر ایسا سرمایہ کاری نظام قائم کرنا ہے جو زرعی اور دیہی ترقیاتی حالات سے ہم آہنگ ہو، اس میں متوازن ڈھانچہ، بہترین حکمت عملی اور کارکردگی و افادیت دونوں پر یکساں توجہ شامل ہو۔
اس منصوبے میں سرکاری فنڈز کا کلیدی کردار اجاگر کرتے ہوئے زرعی و دیہی ترقی کی معاونت کے لئے بانڈز، قرضوں اور انشورنس کے بھرپور استعمال کے اقدامات کا خاکہ پیش کیا گیا جبکہ حکومتوں، مالیاتی اداروں اور نجی و سماجی سرمایہ کی ہم آہنگ کوششوں پر بھی زور دیا گیا ہے۔
منصوبے کے مطابق موزوں قیمتوں اور امدادی رقم کی پالیسیوں کو بھی زیادہ ہم آہنگ اور موثر انداز میں نافذ کیا جائے گا۔
زراعت، دیہی علاقوں اور کسانوں سے متعلق مسائل کا حل چین کے ترقیاتی ایجنڈے میں سرفہرست ترجیح بنا ہوا ہے جبکہ ہمہ گیر سطح پر دیہی احیا کو آگے بڑھانا ایک اہم ترین ہدف کے طور پر شامل ہے۔
اس مقصد کے لئے چین کے 15 ویں پانچ سالہ منصوبے (2026-2030) کا خاکہ ان پالیسیوں کی افادیت بڑھانے پر زور دیتا ہے جن کا مقصد زراعت کو مضبوط بنانا، کسانوں کو فائدہ پہنچانا اور دیہی علاقوں کو خوشحال بنانا ہے۔ یہ منصوبہ متعلقہ نظام اور پالیسی لائحہ عمل میں بہتری لانے، شہری اور دیہی علاقوں کے درمیان وسائل کا دو طرفہ بہاؤ آسان بنانے اور زرعی و دیہی ترقی میں نئی روح پھونکنے کی تاکید کرتا ہے۔