غزہ ،یروشلم(نیشنل ٹائمز)غزہ شہر میں منگل کو شدید اسرائیلی بمباری کے نتیجے میں 2 بچوں اور ایک خاتون سمیت 3فلسطینی شہید اور 8 زخمی ہوگئے ۔اسرائیلی وزیر دفاع اسرائیل کاٹز نے دعویٰ کیا کہ کارروائی کے دوران حماس کے ایک اعلیٰ عہدیدار کو گرفتار کرلیا گیا، تاہم نام ظاہر نہیں کیا۔ غزہ میں سکیورٹی ذرائع نے دعویٰ کیا کہ حماس کے اہم رہنما کو پکڑنے کی اسرائیلی کارروائی ناکام بنادی گئی اور خصوصی فورسز واپس چلی گئیں۔ اسرائیلی فوج نے کہا کہ سکیورٹی فورسز کو لاحق خطرات ختم کرنے کیلئے متعدد اہداف کو نشانہ بنایا گیا۔ اسرائیلی وزیراعظم نیتن یاہو کی اہلیہ سارہ نیتن یاہو نے اپوزیشن رہنما یائر گولان پر الزام عائد کیا ہے کہ وہ 7 اکتوبر 2023 کے حماس حملے سے پہلے منصوبے سے آگاہ تھے ۔