کوئٹہ (نیشنل ٹائمز) حکومتِ بلوچستان نے 9 انتہائی مطلوب دہشتگرد خواتین سے متعلق معلومات فراہم کرنے پر 10 سے 15 لاکھ روپے تک انعام مقرر کر دیا ہے، جبکہ اطلاع دینے والے افراد کی شناخت مکمل طور پر خفیہ رکھنے کی یقین دہانی کرائی گئی ہے۔

معاون وزیرِ داخلہ برائے میڈیا امور بابر یوسفزئی کے مطابق حکومت نے مطلوب خواتین دہشتگردوں کے بارے میں معلومات فراہم کرنے والوں کیلئے انعام کا اعلان کیا ہے۔ انہوں نے کہا کہ ان خواتین کی نشاندہی میں مدد دینے یا ان کے بارے میں قابلِ اعتماد اطلاع فراہم کرنے والے افراد کی شناخت ہر صورت خفیہ رکھی جائے گی۔

بابر یوسفزئی نے بتایا کہ مطلوب خواتین کا تعلق بلوچستان کے علاقوں گوادر، جیوانی اور تربت سے ہے اور حکومتِ بلوچستان نے انہیں انتہائی مطلوب قرار دیا ہے۔

انہوں نے عوام سے اپیل کی کہ مطلوب خواتین کے بارے میں کسی بھی قسم کی معلومات حکومت کو فراہم کی جائیں تاکہ قانون نافذ کرنے والے اداروں کو کارروائی میں مدد مل سکے۔