اسلام آباد (نیشنل ٹائمز) وزیراعظم محمد شہباز شریف کی ہدایت پر پمز سمیت ملک بھر کے سرکاری ہسپتالوں کے انتظامی امور، طبی سہولیات اور کارکردگی کی مؤثر نگرانی کیلئے مینجمنٹ اوورسائٹ کمیٹی قائم کر دی گئی ہے، جس کی سربراہی وزیراعلیٰ پنجاب کے ہیلتھ ایڈوائزر میجر جنرل (ر) ڈاکٹر اظہر محمود کیانی کو سونپی گئی ہے۔وفاقی وزیر برائے قانون و انصاف اعظم نذیر تارڑ نے میڈیا سے گفتگو کرتے ہوئے بتایا کہ پمز ہسپتال میں نومولود بچوں کی المناک ہلاکت کے واقعے کے بعد سرکاری ہسپتالوں کے انتظامی اور طبی امور میں بہتری لانے، حفاظتی اقدامات مؤثر بنانے اور مریضوں کو معیاری طبی سہولیات کی فراہمی یقینی بنانے کیلئے کمیٹی تشکیل دی گئی ہے۔انہوں نے بتایا کہ مینجمنٹ اوورسائٹ کمیٹی سرکاری ہسپتالوں میں مریضوں کی دیکھ بھال، حفاظتی انتظامات، انتظامی نظام اور مجموعی کارکردگی کا جائزہ لے گی اور بہتری کیلئے اصلاحات سے متعلق سفارشات مرتب کرے گی۔کمیٹی بالخصوص پمز کے انتظامی ڈھانچے میں بہتری، مؤثر مینجمنٹ سسٹم کے نفاذ اور ہسپتال کے انتظامی امور کو مزید بہتر بنانے کیلئے تجاویز مرتب کرکے وزیراعظم کو پیش کرے گی۔