اسلام آباد (نیشنل ٹائمز) پمز اسپتال میں نرسری آتشزدگی کے واقعے سے متعلق سی ڈی اے کی جاری کردہ رپورٹ میں اسپتال کے حفاظتی انتظامات اور سیکیورٹی اسٹاف کی کارکردگی پر سنگین سوالات اٹھائے گئے ہیں۔
رپورٹ کے مطابق چلڈرن ہاسپٹل کا مین گیٹ بند تھا اور اس پر تالا لگا ہوا تھا، جس کے باعث ہنگامی صورت حال میں آمدورفت اور امدادی کارروائیوں میں مشکلات پیدا ہونے کا خدشہ ظاہر کیا گیا ہے۔
سی ڈی اے رپورٹ میں اسپتال کے سیکیورٹی انتظامات کو بھی ناقص قرار دیتے ہوئے سیکیورٹی اسٹاف کی کارکردگی پر سوالات اٹھائے گئے ہیں۔ رپورٹ کے مطابق ہنگامی صورتحال سے نمٹنے کے لیے سیکیورٹی عملے کی جانب سے مؤثر اقدامات نظر نہیں آئے۔
رپورٹ میں اسپتال انتظامیہ کی کارکردگی پر بھی تحفظات کا اظہار کیا گیا ہے اور کہا گیا ہے کہ فائر سیفٹی اور ایمرجنسی رسپانس کے حوالے سے انتظامات تسلی بخش نہیں تھے۔
واقعے کے بعد اسپتال میں حفاظتی انتظامات کا تفصیلی جائزہ لیا جا رہا ہے جبکہ متعلقہ حکام نے آتشزدگی کی وجوہات اور مبینہ غفلت کے ذمہ داروں کا تعین کرنے کے لیے تحقیقات شروع کر دی ہیں۔
حکام کا کہنا ہے کہ تحقیقات مکمل ہونے کے بعد ذمہ دار عناصر کے خلاف قانون کے مطابق کارروائی عمل میں لائی جائے گی۔
