ہانگ کانگ (شِنہوا) ہانگ کانگ خصوصی انتظامی علاقے (ایچ کے ایس اے آر) کی حکومت کی آئینی اور مین لینڈ سے متعلق امور کی سیکرٹری جینس تسے سیو وا نے کہا ہے کہ حکومت ہانگ کانگ کے عوام کی آرا جمع کرنے اور ان کا تجزیہ کرنے کی کوششیں جاری رکھے گی اور ستمبر کے دوران ہانگ کانگ کا پہلا 5 سالہ منصوبہ جاری کرنے کی کوشش کرے گی۔
جینس تسے سیو وا نے کہا کہ یہ منصوبہ نہ صرف ہانگ کانگ کے لئے ایک اہم معاملہ ہے بلکہ 15 ویں 5 سالہ قومی منصوبے کا بھی ایک لازمی حصہ ہے۔ یہ ملک کی مجموعی ترقی میں شامل ہونے اور اس کی خدمت کے لئے ایک اہم اقدام اور ہانگ کانگ میں عوامی انتظامیہ کے حوالے سے ایک سنگ میل کی حیثیت رکھتا ہے۔
انہوں نے بتایا کہ عوامی مشاورت کا عمل 15 جون سے 14 اگست تک جاری رہا جس کے دوران 100 سے زائد مشاورتی اجلاس منعقد کئے گئے۔ ان میں تقریباً 30 اجلاس ہانگ کانگ کے چیف ایگزیکٹو نے خود مختلف شعبوں کی آراء اور تجاویز سننے کے لئے منعقد کئے۔
تسے نے مزید کہا کہ جمعہ تک ایچ کے ایس اے آر حکومت کو مختلف شعبوں، عام لوگوں اور مختلف پس منظر رکھنے والے متعلقہ فریقوں کی جانب سے 16 ہزار سے زائد تجاویز موصول ہو چکی تھیں۔ ان میں عمومی طور پر اس بات سے اتفاق کیا گیا کہ یہ منصوبہ ہانگ کانگ کو مواقع سے بہتر طور پر فائدہ اٹھانے اور مستقبل کے لئے موثر حکمت عملی وضع کرنے میں مدد دے گا۔
تسے نے کہا کہ عوام اور متعلقہ فریقوں نے اس منصوبے کی تشکیل کو بہت سنجیدگی سے لیا ہے اور انہیں ہانگ کانگ کے مستقبل پر بھرپور اعتماد ہے۔ وہ آئندہ 5 برسوں کے لئے مشترکہ طور پر ایک جامع خاکہ تشکیل دینے اور ملک کی مجموعی ترقی میں بہتر طور پر ضم ہونے اور اس کی خدمت کے لئے اپنی آراء پیش کرنے کے خواہاں ہیں۔