بیجنگ (شِنہوا) چین کی وزارت دفاع کے ترجمان نے جاپان کی دوبارہ ابھرتی عسکریت پسندی سے لاحق خطرات کے خلاف چوکس رہنے پر زور دیا ہے۔
چینی وزارت دفاع کے ترجمان چھن شی نے ایک پریس بریفنگ کے دوران جاپان کی وزارت دفاع کی جانب سے مالی سال 2027 کے لئے ریکارڈ زیادہ دفاعی بجٹ پیش کئے جانے سے متعلق سوال کا جواب دیا۔
سوال میں یہ بھی نشاندہی کی گئی کہ ہفتہ 15 اگست جاپان کی جانب سے غیر مشروط ہتھیار ڈالنے کے اعلان کے 81 سال مکمل ہونے کا دن ہے۔
چھن نے کہا کہ جاپان کے ہتھیار ڈالنے سے قبل جاپانی عسکریت پسندوں نے پورے ایشیا کو خونریزی اور تباہی کے اندھے کنویں میں دھکیل دیا تھا۔ تاہم شکست کے بعد جاپان نے طویل عرصے تک اپنے دائیں بازو کے عناصر کو جارحیت کے جرائم کو سفید کرنے اور ان سے انکار کرنے کی اجازت دی، امن پسند آئین اور صرف دفاعی نوعیت کے اصول سے آزاد ہونے کے لئے ہر ممکن راستہ اختیار کیا اور جنگ کے بعد کے بین الاقوامی نظام کو چیلنج کرنے کی کوشش کی اور تاریخ سے حقیقی سبق حاصل کرنے میں ناکام رہا۔
ترجمان کے مطابق حالیہ عرصے میں بیرونی خطرات سے نمٹنے کے نام پر جاپان نے اپنے دفاعی بجٹ میں نمایاں اضافہ کیا، جارحانہ صلاحیتوں کو تیزی سے ترقی دی اور اپنی فوجی صنعت کو جارحانہ انداز میں وسعت دی ہے۔
چھن نے کہا کہ “جاپان کی دوبارہ ابھرتی عسکریت پسندی نے اس کے حقیقی عزائم کو بے نقاب کر دیا ہے اور ہمیں اس سے لاحق خطرات کے خلاف چوکس رہنا چاہیے۔”
ترجمان نے کہا کہ “ہم جاپانی فریق پر زور دیتے ہیں کہ وہ سنجیدگی سے اپنا محاسبہ کرے، اپنے جرائم کو تسلیم کرتے ہوئے ان کا کفارہ ادا کرے، جنگ کے بعد کے بین الاقوامی نظام کی پاسداری کرے اور دوبارہ عسکری طاقت بننے کی خطرناک سرگرمیوں کو روکے۔ غلط راستے کی طرف کوئی بھی واپسی مزید عبرتناک شکست اور زیادہ مکمل احتساب کا باعث بنے گی۔”