بیجنگ (شِنہوا) چینی وزیراعظم لی چھیانگ نے مربوط سرکٹس (آئی سی) کے لے آؤٹ ڈیزائنز کے تحفظ سے متعلق نظرثانی شدہ ضوابط جاری کرنے کے لئے ریاستی کونسل کے ایک فرمان پر دستخط کر دیئے ہیں۔
یہ ضوابط 15 اکتوبر سے نافذ العمل ہوں گے۔ ان کا مقصد آئی سی لے آؤٹ ڈیزائنز کے تحفظ اور ان کے عملی استعمال کو فروغ دینا، اندراج اور انتظامی نظام کو موثر بنانا، کامیاب عملی تجربات کو ضوابط کا حصہ بنانا اور متعلقہ قوانین و بین الاقوامی معاہدوں سے ہم آہنگی پیدا کرنا ہے۔
وزارت انصاف اور چین کی قومی تخلیقی املاک انتظامیہ کے حکام کے مطابق مربوط سرکٹ ٹیکنالوجی میں تیز رفتار ترقی اور عملی ضروریات کے پیش نظر 2001 میں متعارف کرائے گئے اصل ضوابط پر نظرثانی ضروری ہو گئی تھی۔
نظرثانی شدہ ضابطے میں درخواست دینے اور جانچ کے طریقہ کار کو مزید بہتر بنایا جائے گا۔ اس میں واضح کیا گیا ہے کہ درخواستیں حقیقی تخلیقی سرگرمیوں پر مبنی ہونی چاہئیں اور ان میں کسی بھی قسم کی جعل سازی شامل نہیں ہونی چاہیے۔ اس کے تحت اصلیت سے متعلق ایک بیان جمع کرانا لازمی قرار دیا گیا ہے، جبکہ یہ بھی واضح کیا گیا ہے کہ جمع کرائی جانے والی نقول یا خاکوں میں اصل حصوں کی واضح نشاندہی ہونی چاہیے۔
ضوابط میں غیر معیاری درخواستیں مسترد کرنے، غلط طریقے سے رجسٹر ہونے والے ڈیزائنز کی رجسٹریشن منسوخ کرنے اور ناگزیر حالات یا دیگر جائز وجوہات کی بنا پر ضائع ہونے والے حقوق کی بحالی کا طریقہ کار بھی وضع کیا گیا ہے۔
نظرثانی شدہ ضوابط میں خصوصی حقوق کے تحفظ کو مزید مضبوط بنایا گیا ہے۔ ان کے مطابق خلاف ورزی کی صورت میں ہرجانے کا تعین متاثرہ فریق کے حقیقی نقصان یا خلاف ورزی سے حاصل ہونے والے منافع کی بنیاد پر کیا جائے گا۔ اگر حقیقی نقصان یا حاصل ہونے والے منافع کا درست اندازہ لگانا ممکن نہ ہو تو ہرجانے کی رقم لائسنس فیس کے مناسب تناسب سے مقرر کی جائے گی۔
سنگین نوعیت کی خلاف ورزیوں کی صورت میں تعزیری ہرجانہ بھی لاگو ہوگا۔
آئی سی لے آؤٹ ڈیزائنز کے فروغ کے لئے ضوابط میں متعلقہ اداروں کو عوامی خدمات بہتر بنانے کی ہدایت دی گئی ہے جبکہ قانونی اور غیر قانونی شخصیت رکھنے والی تنظیموں کو پابند کیا گیا ہے کہ وہ اپنی نگرانی میں ایسے ڈیزائن تیار کرنے والے اہل افراد کو مناسب انعام اور معاوضہ فراہم کریں۔
ضوابط میں حقوق کی منتقلی، لائسنسنگ اور رہن رکھنے سے متعلق تقاضوں کو بھی مزید واضح کیا گیا ہے جبکہ مشترکہ مالکان کے درمیان حقوق کے استعمال اور لائسنس فیس کی تقسیم کے اصول بھی متعین کئے گئے ہیں۔
ضوابط کے نافذ ہونے کے بعد متعلقہ حکام ان قوانین سے متعلق آگاہی بڑھانے، معاون انتظامی ڈھانچے کو بہتر بنانے اور ان پر موثر عملدرآمد کو یقینی بنانے پر توجہ دیں گے۔