واشنگٹن (نیشنل ٹائمز)امریکی سینٹرل کمانڈ (سینٹ کام) نے مشرق وسطیٰ میں ممکنہ زمینی فوج کی تعیناتی پر غور شروع کر دیا ہے، جبکہ اس مقصد کے لیے امریکی پیرا ٹروپرز کی تربیت بھی جاری ہے۔

سینٹ کام کے مطابق پیرا ٹروپرز مشرق وسطیٰ میں ممکنہ تعیناتی کے پیش نظر مختلف ہتھیاروں اور آپریشنل مہارتوں کی خصوصی تربیت حاصل کر رہے ہیں تاکہ کسی بھی ممکنہ کارروائی کے لیے مکمل طور پر تیار رہیں۔

سینٹ کام نے مزید بتایا کہ امریکی فوج کا چنوک ہیلی کاپٹر بھی مشرق وسطیٰ میں آپریشنل تعیناتی کی تیاری کر رہا ہے۔

بیان کے مطابق چنوک ہیلی کاپٹر ہر قسم کے موسمی اور جغرافیائی ماحول میں اہلکاروں، فوجی سازوسامان اور رسد کی نقل و حمل کے لیے موزوں سمجھا جاتا ہے اور امریکی فوج کی فضائی نقل و حرکت میں اہم کردار ادا کرتا ہے۔