تہران(نیشنل ٹائمز) ایران کے وزیر خارجہ عباس عراقچی نے ایک بار پھر واضح کیا ہے کہ ایران کے خلاف کسی بھی قسم کی جارحیت کا بھرپور اور فیصلہ کن جواب دیا جائے گا۔
سماجی رابطے کی ویب سائٹ پر جاری بیان میں عباس عراقچی نے کہا ایران یا ہمارے بنیادی ڈھانچے کے خلاف کسی بھی قسم کی جارحیت کا جواب طاقتور اور فیصلہ کن انداز میں دیا جائے گا۔
انہوں نے کہا کہ جو بھی ممالک یا فریقین کسی بھی نوعیت کی حمایت کے ذریعے اس جارحیت میں معاونت کریں گے، انہیں بھی جائز اہداف تصور کیا جائے گا۔
ایرانی وزیر خارجہ نے اس عزم کا اعادہ کیا کہ ایران اپنی خود مختاری، قومی سلامتی اور اہم تنصیبات کے تحفظ کیلئے ہر ممکن اقدام کرے گا اور کسی بھی حملے کا مؤثر جواب دینے میں ہچکچاہٹ کا مظاہرہ نہیں کرے گا۔
